„43 ათასამდე აქსტრაზენეკა უნდა შემოვიდეს 15 ივნისამდე,“ – განაცხადა დღეს, 25 მაისს, საკოორდინაციო საბჭოს სხდომის შემდეგ დაავადებათა კონტროლის ცენტრის დირექტორმა, ამირან გამყრელიძემ.
ამირან გამყრელიძის თქმით, ამ ეტაპზე არაა ცნობილი როდის შემოვა საქართველოში „ფაიზერის“ ვაქცინა.
„დადასტურებულია, რომ ივნისის ბოლოს, სულ გვიან ივლისის პირველ რიცხვებში, ნახევარი მილიონი „სინოფარმი“ უნდა შემოვიდეს, შემდეგ, მესამე კვარტალში კონტრაქტი დასრულების პირას არის, უნდა შემოვიდეს ასევე თანდათანობით მილიონი დოზა „ფაიზერი“. პარალელურად მიმდინაროებს მოლაპარაკებები „სინოვაკთან“, „ნოვოვაქსთან“, ჩვენ მილიონ 400 ათასი დოზა უნდა მივიღოთ „კოვაქსის“ საშუალებით,“ – ამბობს ამირან გამყრელიძე.
25 მაისის მდგომარეობით ქვეყანაში 117 ათასი ადამიანია აცრილი.
საკოორდინაციო საბჭოს გადაწყვეტილებით, სახმელეთო საზღვრები პირველი ივნისიდან იხსნება, ასევე უქმდება შეზღუდვები რესტორნებისა და კაფეების მუშაობაზე.
იმ ქვეყნების ჩამონათვალს, რომელთა მოქალაქეებს და რეზიდენტებს საქართველოს საზღვრის კვეთა ბოლო 72 საათში ჩატარებული PCR-ტესტის უარყოფითი პასუხით შეეძლებათ, ემატება იაპონია, კანადა, ქუვეითი, ჩინეთი, სამხრეთ კორეა, მოლდოვა და ომანი.
„არ არის გამორიცხული, რომ აგვისტოში, აგვისტოს ბოლოსკენ, ისევ დაიწყოს როგორც ევროპაში, ისე გლობალურად შემთხვევების ზრდა ძირითადად ახალი, მუტირებული შტამების ხარჯზე,“ – განაცხადა დღეს, 25 მაისს, საკოორდინაციო საბჭოს სხდომის შემდეგ ამირან გამყრელიძემ.
ამირან გამყრელიძე: გამორიცხული არაა აგვისტოში კოვიდის შემთხვევების ზრდა
