„არ არის გამორიცხული, რომ აგვისტოში, აგვისტოს ბოლოსკენ, ისევ დაიწყოს როგორც ევროპაში, ისე გლობალურად შემთხვევების ზრდა ძირითადად ახალი, მუტირებული შტამების ხარჯზე,“ – განაცხადა დღეს, 25 მაისს, საკოორდინაციო საბჭოს სხდომის შემდეგ ამირან გამყრელიძემ, დაავადებათა კონტროლის ეროვნული ცენტრის ხელმძღვანელმა.
მას ჟურნალისტებმა ჰკითხეს, მოხსნილი შეზღუდვების ფონზე რამდენად მოსალოდნელია ისევ განმეორდეს გასული წლის ზაფხულის მაჩვენებელი.
ამირან გამყრელიძის თქმით, გლობალურად კორონავირუსის შემთხვევათა რაოდენობა ყველგან თანდათან ნელი ტემპით იკლებს, თუმცა აგვისტოს ბოლოსთვის ასევე გლობალურად შემთხვევების რაოდენობა ისევ მოიმატებს.
„ამიტომ ყველგან, სადაც შემსუბუქებები მიმდინარეობს და ეს მიმდინარეობს ევროპის თითქმის ყველა ქვეყანაში, მეტი ყურადღება კეთდება რეკომენდაციების დაცვაზე: პირბადე, დისტანცია, დიდი თავშეყრების თავის არიდება და რაც შეიძლება მეტი აცრა,“ – აღნიშნა ამირან გამყრელიძემ.
დღეს, 25 მაისს, საკოორდინაციო საბჭოს გადაწყვეტილებით, სახმელეთო საზღვრები პირველი ივნისიდან იხსნება, ასევე უქმდება შეზღუდვები რესტორნებისა და კაფეების მუშაობაზე.
