მარიამი, ჯანი და აზიფე სკოლაში აუცილებლად ისწავლიან – ირწმუნება განათლების სამინისტრო. ეს ის სამი ბავშვია, რომლებსაც სკოლაში არასდროს უვლიათ. მათი ისტორია საზოგადოებას „ბათუმელებმა“ გააცნო.
9, 11 და 16 წლის ბავშვები ვერ სარგებლობენ კონსტიტუციური უფლებით – მიიღონ საბაზო განათლება. ბავშვების დედა ამბობს, რომ სკოლებს ბავშვების ჩარიცხვასთან დაკავშირებით ორჯერ მიმართა, თუმცა სათანადოდ ვერ მიაწოდეს ინფორმაცია, როგორ უნდა მოქცეულიყო.
„უმცროსი ანუ ცხრა წლის ბავშვი უკვე დარეგისტრირდა და სექტემბრიდან სკოლაში ივლის. 11 წლის ჯანისთან დისციპლინური კომისია მუშაობს, რომელიც დაადგენს რომელ კლასში უნდა დაჯდეს ბავშვი, თუმცა, ჩათვალეთ, რომ ჯანი უკვე სკოლაშია,“- გვითხრეს საქართველოს განათლების სამინისტროში.
რაც შეეხება 16 წლის მარიამს, სამინისტროს ინფორმაციით, მასთან მანდატურის სამსახურის ფსიქოლოგი მუშაობს და ასევე მოზარდის დედას, როგორც ბავშვის იურიდიულ წარმომადგენელს, სთხოვეს ხელმეორედ მიმართოს სკოლას ბავშვის ჩასარიცხად.
რადგან მარიამს მეორე კლასის შემდეგ სკოლაში არ უვლია, ქართულ სკოლაში კი არასდროს, სტანდარტი ითვალისწინებს მისთვის სპეციალური საგანმანათლებლო პროგრამის შემუშავებას, რომელიც მას აკადემიური ჩამორჩენის დაძლევაში დაეხმარება.
„როგორც ვიცით, უკვე შემუშავებულია რამდენიმე კურიკულუმი, ეს არის სპეციალურად სკოლის მიღმა ბავშვებისთვის და იმ ბავშვებისთვის, რომლებიც დაგვიანებით შევიდნენ სკოლაში და თუ საჭირო გახდება, ინდივიდუალურადაც იმუშავებს სპეციალისტი ყველა ბავშვთან. მათთან იმუშავებენ სოციალური მუშაკებიც,“- გვითხრეს სამინისტროში.
შეეძლო თუ არა სკოლას თავიდანვე დაეკვალიანებინა და არა 9-10 წლის შემდეგ? – სამინისტროში გვითხრეს, რომ ამ კითხვაზე პასუხის გაცემა მათი კომპეტენცია არ არის.
„იუსტიციას უნდა მიაკითხოს მშობელმა, რადგან იქიდან იწყება ნებისმიერი საქმის წარმოება. შესაბამისად, იქ დააკვალიანებდნენ,“ – გვიპასუხეს სამინისტროში.
მარიამი, ჯანი და აზიფე ონდერები თავდაპირველად თურქეთის რესპუბლიკაში ცხოვრობდნენ, თუმცა მათი მშობლები დაქორწინებიდან რამდენიმე წელში საქართველოში, კერძოდ კი, ბათუმში გადმოვიდნენ საცხოვრებლად. ბავშვებიდან მხოლოდ მარიამია საქართველოს მოქალაქე, ჯანი და აზიფე კი თურქეთის მოქალაქეები არიან. სწორედ ეს იყო იმის მიზეზი, რომ ბავშვები საჯარო სკოლაში არ მიიღეს.
მარიამის შემთხვევაში კი, როგორც დედა ამბობდა, სკოლამ მიღებაზე უარი მშობელს იმ მოტივით უთხრა, რომ მან ვერ წარმოადგინა თურქულ სკოლაში ორწლიანი სწავლის დამადასტურებელი დოკუმენტი. დედის თქმით, მარიამი თურქულ სკოლაში არაოფიციალურად იყო ჩარიცხული და შესაბამისად, სკოლა ვერ მისცემდა დოკუმენტს.
ოფიციალური მონაცემების მიხედვით, ქვეყანაში 10 ათასზე მეტი 16 წლამდე ბავშვია, რომლებსაც არასდროს ჰქონიათ მოსწავლის სტატუსი. აქედან კი, სულ ცოტა, 5 ათასი ბავშვის იდენტიფიცირებას სახელმწიფო ვერ ახერხებს.
_______________
ამავე თემაზე:
