რუსთაველის ეროვნული სამეცნიერო ფონდი „ბათუმელებში“ გამოქვეყნებულ მასალას ეხმაურება. მათ მიერ მოწოდებულ ტექსტში აღნიშნავენ, რომ დარღვევები, რაზეც სახელმწიფო აუდიტი თავის დასკვნებში საუბრობს, იმ პერიოდს ეხება, როცა ფონდს სხვა ხელმძღვანელი ჰყავდა. „წინა ხელმძღვანელი“, ანუ ფონდის გენერალური დირექტორი მაშინ ზვიად გაბისონია იყო.
„აღსანიშნავია, რომ 2020 წლის აგვისტოდან ფონდს ჰყავს ახალი ხელმძღვანელობა, რომელსაც აქვს ახალი ხედვები და მიდგომები, რომელიც ითვალისწინებს როგორც ფონდის სტრუქტურულ რეორგანიზაციას, რეფორმირებას, ასევე სამეცნიერო საგრანტო კონკურსების ადმინისტრირების შეცვლას,“ – მოგვწერეს ფონდიდან.
ფონდის გენერალური დირექტორი ამ ეტაპზე ჯაბა სამუშიაა, თუმცა ის გენერალური დირექტორის მოადგილე იყო 2018 წელს. სახელმწიფო აუდიტის დასკვნაში ამ წელში ჩატარებულ კონკურსებზეც არის საუბარი.
ფონდიდან გვწერენ, რომ მომავალში დაგეგმილია ქვეყნის წინაშე მდგარ გამოწვევებზე ორიენტირებული სხვადასხვა თემატური ახალი კონკურსების გამოცხადება. ამისთვის 8 მილიონი ლარია გამოყოფილი და აღნიშნული კონკურსები ახალი სტანდარტებით ჩატარდება.
„მთლიანად შეცვლილია დარგობრივი კლასიფიკატორი, შეფასების კრიტერიუმები,“ – გვწერს ფონდი.
რაც შეეხება სახელმწიფო აუდიტის სამსახურის კრიტიკულ დასკვნას, ფონდში ამ საკითხზე დასმულ კითხვებს პირდაპირ არ პასუხობენ. ზოგადი ხედვა კი ასეთია: „რაც შეეხება სახელმწიფო აუდიტის სამსახურის დასკვნას, მასში საუბარია 2017-2018 წლების კონკურსებზე და, შესაბამისად, შენიშვნებიც ამ პერიოდს ეხება. აღსანიშნავია, რომ 2020 წლის აგვისტოდან ფონდს ჰყავს ახალი ხელმძღვანელობა, რომელსაც აქვს ახალი ხედვები და მიდგომები, რომელიც ითვალისწინებს როგორც ფონდის სტრუქტურულ რეორგანიზაციას, რეფორმირებას, ასევე სამეცნიერო საგრანტო კონკურსების ადმინისტრირების შეცვლას. მომავალში დაგეგმილია ქვეყნის წინაშე მდგარ გამოწვევებზე ორიენტირებული სხვადასხვა თემატური ახალი კონკურსების გამოცხადებაც“.
მოგვიანებით დაგვიკავშირდა ფონდის გენერალური დირექტორი ჯაბა სამუშია, რომელიც ამბობს, რომ წინა წლებში დაშვებულ შეცდომებზე ახალი მენეჯმენტი ვერ იქნება პასუხისმგებელი.
„თუ წინა წლებში ვინმემ რაიმე დააშავა, მე ამაზე პასუხი ნამდვილად არ მაქვს, მე შემიძლია გითხრათ, რომ 2020 წლის აგვისტოში ჩემი მოსვლის შემდეგ, თავიდან ბოლომდე შეიცვალა კრიტერიუმები და მიდგომები, ამიტომ 2017-18 წელს გაფორმებულ ხელშეკრულებებთან მე არ მქონდა არანაირი შემხებლობა. ამის შემდეგ კი, ბუნებრივია მე ვაგებ პასუხს ნებისმიერ საკითხზე რომელიც ფონდს შეეხება“-ამბობს სამუშია.
____________________
ამ თემაზე:
8 მლნ ლარი გამოუყვეს ფონდს, სადაც აუდიტმა დარღვევები აღმოაჩინა
