ბრაზილიის სამხრეთით მდებარე ქალაქ ენკანტადოში დგამენ ქრისტეს ქანდაკებას, რომელიც სკულპტორის ჩანაფიქრის მიხედვით იმაზე მაღალი იქნება, ვიდრე რიო დე ჟანეიროს ქრისტეს ცნობილი ქანდაკებაა.
ახალი ქანდაკება მსოფლიოში სიმაღლით ქრისტეს მესამე ყველაზე დიდი სკულპტურა იქნება, 43 მეტრი სიმაღლის. ქანდაკების სიგანე 36 მეტრია. მასში ლიფტს დაამონტაჟებენ, რომელიც ვიზიტორებს 40 მეტრის სიმაღლეზე აიყვანს, სპეციალურად მოწყობილ სივრცეში, საიდანაც ვრცელი ხედები იშლება ქალაქზე.
მონუმენტის მონტაჟი 2019 წელს დაიწყო და 2021 წლის ბოლომდე დასრულდება. „მფარველი ქრისტეს“ ქანდაკების იდეა ქალაქ ენკანტადოს მერს ეკუთვნის, რომელიც ცოტა ხნის წინ, მარტში გარდაიცვალა კორონავირუსით.
სამუშაოების შესასრულებლად 350 ათასი დოლარია გამოყოფილი. თანხა კომპანიების, ასოციაციებისა და კერძო პირების შეწირულობებით გროვდება.
,,მფარველი ქრისტეს“ ქანდაკებაზე მაღალი მხოლოდ ინდონეზიის შტატ სულავესის ქანდაკება ,,ქრისტეს დალოცვა“ და პოლონეთის ქალაქ სვებოძინის „მეფე-ქრისტეა“. ინდონეზიის ქრისტეს ქანდაკების სიმაღლე 52,55 მეტრია, პოლონეთის კი – 52,5 მეტრი.
ყველა ზემოთ ჩამოთვლილი ქანდაკება რიო დე ჟანეიროს ქრისტეს ყველაზე ცნობილ ქანდაკებაზე მაღალია. რიოს ქრისტეს სიმაღლე 38 მეტრია. მსოფლიოში არსებობს ქრისტეს ქანდაკებაზე ბევრად მაღალი ქალწული მარიამისა და ბუდას ქანდაკებები.
მთავარ ფოტოზე: ქრისტეს ქანდაკების მშენებლობა ბრაზილიის ქალაქ ენკანტადოში/ ფოტო: nova.rs, Silvio Avila/AFP/Profimedia
