Batumelebi | საქართველოში შემოსვლა 18 ქვეყნის მოქალაქეებს ტრანზიტად შეუძლიათ საქართველოში შემოსვლა 18 ქვეყნის მოქალაქეებს ტრანზიტად შეუძლიათ – Batumelebi
RU | GE  

საქართველოში შემოსვლა 18 ქვეყნის მოქალაქეებს ტრანზიტად შეუძლიათ

18 ქვეყნის მოქალაქეებს და ამ ქვეყნებში მუდმივი ბინადრობის [ცხოვრების] უფლების მქონე პირებს, ამავე ქვეყნებიდან საქართველოში საჰარეო სივრცის გამოყენებით შემოსვლის უფლება მიეცათ ტრანზიტული მგზავრობისათვის მესამე ქვეყნის გამოყენების შემთხვევაშიც.

მთავრობის 21 დეკემბრის დადგენილებით, საქართველოში შემოსვლის უფლება აქვთ აღნიშნული ქვეყნების როგორც მოქალაქეებს, ასევე ამ ქვეყნებში მუდმივი ბინადრობის [ცხოვრების] უფლების მქონე პირებს, რომლებიც საქართველოში მოემგზავრებიან ამავე ქვეყნებიდან [მათ შორის, ტრანზიტული მგზავრობისათვის მესამე ქვეყნების გამოყენების შემთხვევაშიც].

ეს ქვეყნებია:

გერმანია, საფრანგეთი, ლატვია, ლიეტუვა, ესტონეთი, ესპანეთი, ლუქსემბურგი, ნიდერლანდები, პოლონეთი, პორტუგალია, რუმინეთი, საბერძნეთი, შვედეთი, ხორვატია, იტალია, კვიპროსი, სლოვენია, ისლანდია.

ამასთან, გერმანიის, საფრანგეთის, ლატვიის, ლიეტუვისა და ესტონეთის მოქალაქეები და მუდმივი ბინადრობის [ცხოვრების] უფლების მქონე პირები, ამავე ქვეყნებიდან გამომგზავრების შემთხვევაში [მათ შორის, ტრანზიტული მგზავრობისათვის მესამე ქვეყნების გამოყენებით], საქართველოში შემოსვლისას არ ექვემდებარებიან „იზოლაციისა და კარანტინის წესებით“ გათვალისწინებულ იზოლაციას/კარანტინს.

თუმცა, ამ ქვეყნების მოქალაქეები იზოლაციას/კარანტინს დაექვემდებარებიან იმ შემთხვევაში თუ:

  • საქართველოში შემოსვლამდე ბოლო 14 დღის განმავლობაში მოგზაურობა უფიქსირდებათ გერმანიის, საფრანგეთის, ლატვიის, ლიეტუვისა და ესტონეთის გარდა ნებისმიერ სხვა ქვეყანაში;
  • სასაზღვრო პუნქტებზე თერმული სკრინინგის შედეგად 37 გრადუსზე მეტი ტემპერატურის დაფიქსირების გამო ჩაუტარდებათ PCR კვლევა და ამ კვლევის შედეგად დაუდასტურდებათ ახალი კორონავირუსი.

პანდემიის გამო, 2020 წლის 18 მარტიდან, სხვა ქვეყნებიდან საქართველოში შემოსვლის უფლება აქვთ მხოლოდ საქართველოს მოქალაქეებს და მათი ოჯახის წევრებს. ეს შეზღუდვა აღნიშნული 18 ქვეყნის მოქალაქეებისთვის, თუ ისინი საქართველოში ამავე ქვეყნებიდან მოემგზავრებიან, 9 ივლისიდან მოიხსნა.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com