ბელგიელი მაქსიმ ფინამორი ბათუმში მცხოვრები ერთადერთი მასწავლებელია, ვისთვისაც ფრანგული მშობლიური ენაა და სხვებსაც ასწავლის. მეტიც: მაქსიმმა ბელგიაში ყველაფერი გაყიდა, რაც ებადა. მხოლოდ სამოსი და ხმისჩამწერი სტუდიის აპარატურა ჩააბარგა ჩანთებში და განუსაზღვრელი ვადით ბათუმში ჩამოვიდა საცხოვრებლად.
მაქსიმ ფინამორი / მარიამ ქიქავას ფოტო
მშობლიურ ენას, ფრანგულს ახლა ბათუმში სხვებს ასწავლის, თვითონ კი ქართულს სწავლობს.
მაქსიმ ფინამორი ბათუმში ზუსტად ერთი წლის წინ, 2020 წლის იანვარში ჩამოვიდა გაცვლითი პროგრამა „ევროოდისეას“ ფარგლებში.
„ბელგიაში ანთროპოლოგიას ვსწავლობდი უნივერსიტეტში. ფრანგული ენის მასწავლებელიც ვარ პროფესიით. პარალელურად მუსიკას ვწერ. ძირითადად ელექტრონულ მუსიკას, ჰიპ-ჰოპს. ბელგიაში არის ასეთი არასამთავრობო ორგანიზაცია: ახალგაზრდების ეროვნული ასოციაცია, საიდანაც პროგრამა ევროოდისეას შესახებ გავიგე, რომელიც ახალგაზრდებს სტაჟირებას სთავაზობს სხვადასხვა ქვეყანაში. ჩამონათვალში იყო საფრანგეთი, ესპანეთი, ინგლისი და ა.შ. მაგრამ მე ევროპის მიღმა ცხოვრება მაინტერესებდა.
კავკასიის ქვეყნებზე ბევრი არაფერი ვიცოდი.
აჭარის განათლების სამინისტროში ვმუშაობდი ევროოდისეას ფარგლებში. სამინისტროს მუშაობის პრინციპებს ვეცნობოდი, უცხოური პროგრამების მოძიებაში ვიღებდი მონაწილეობას, კორესპონდენციების მომზადებაშიც ვიღებდი მონაწილეობას და ა.შ. ჩემი სტაჟირების კონტრაქტი აჭარის განათლების სამინისტროსთან მარტში დასრულდა პანდემიის გამო“, – ამბობს მაქსიმ ფინამორი.
მაქსიმ ფინამორი – ფრანგული ენის ბელგიელი მასწავლებელი ბათუმში.
სტაჟირების დასასრულს ბელგიაში დაბრუნდა. რაც ებადა ბათუმში ჩამოიტანა და აქ დასახლდა. ახლა ბათუმის ორ სკოლაში მუშაობს ფრანგულის მასწავლებლად და პარალელურად მოსწავლეებსაც ამზადებს.
როგორც თავად ამბობს, მაქსიმის გაკვეთილები არაორდინალურია: ფრანგულს მოსწავლეებს ძირითადად ინტერაქტიული მეთოდით ასწავლის: საუბრებით და სავარჯიშოებით ღია ცისქვეშ, ზღვის პირას, სახლშიც და ქუჩაშიც. მისი თქმით, ბავშვებსა თუ მოზრდილებს სწავლების ეს ფორმა ძალიან მოსწონთ და საკომუნიკაციო უნარებიც მარტივად უვითარდებათ.
მისი თქმით, ფრანგული ენის შესწავლის მსურველი ბათუმში არც ისე ცოტაა. ბავშვებიც და მოზრდილებიც.
მაქსიმ ფინამორი მსურველებს ამზადებს ასევე ფრანგული ენის ცოდნის დამადასტურებელი საერთაშორისო გამოცდებისთვისაც DELF და DALF.
„ყოველთვის ვცდილობ დავინტერესდე მოსწავლეების ინტერესებით, უნარებით, ჰობით. ეს იმისთვის მჭირდება, რომ სასწავლო თემები ინდივიდუალურად შევურჩიო თითოეულ მათგანს.
უამრავი აქტივობა გვაქვს. ყველასთვის მორგებული და საინტერესო გარემოს შექმნა – აუცილებლად უნდა მოარგო ყველაფერი მოსწავლეების ინდივიდუალურ ინტერესებს. ენის სწავლის პროცესი ფიზიკურ აქტივობებსაც გულისხმობს ხშირად. ევროპული ხელოვნება, მუსიკა, კულტურა, ყველაფერს ვეცნობით და ვსწავლობთ ენასთან ერთად.
ბევრი მოსწავლე მყავს და დრო ძალიან ცოტა მაქვს. პანდემიის პირობებში დისტანციურ სწავლებაზე გადავედით და ეს ჩემთვის მოსახერხებელია“, – ამბობს ფრანგული ენის ბელგიელი მასწავლებელი.
გაზაფხულზე, სანამ სწავლების დისტანციურ რეჟიმზე გადავიდოდა, მოსწავლეებთან ერთად ფრანგულის გაკვეთილების ამსახველი მოკლემეტრაჟიანი ფილმიც გადაიღო, რომელიც მალე გამოვა.
მაქსიმ ფინამორი ბელგიის გარდა სხვადასხვა პროგრამის ფარგლებში მექსიკასა და სენეგალში ცხოვრობდა. სენეგალში რეგიონული რადიოც გახსნა და მიჰყავდა გადაცემა ურბანულ კულტურასა და მუსიკაზე. რადიო სენეგალში ადგილობრივი არტისტების გასაძლიერებლად და პოპულარიზაციისთვის შეიქმნა.
მაქსიმ ფინამორი. ფრანგული ენის ბელგიელი მასწავლებელი ბათუმში
მაქსიმი სენეგალში უწევდა ორგანიზებას ალტერნატიული და ტრადიციული მუსიკის კონცერტებსა და ფესტივალებს. ბელგიაში მუსიკალური ბენდიც ჰყავდა სახელწოდებით Lord and Hardy, ჯგუფს youtube არხი და ჩანაწერებიც აქვს. დაუკრავთ ალტერნატიული მუსიკის არაერთ ფესტივალზე ჰოლანდიასა და ბელგიაში.
ფრანგული ენის ბელგიელი მასწავლებელი ცხოვრების გაგრძელებას ბათუმში გეგმავს. სკოლაში მუშაობის გაგრძელება სურს მას შემდეგაც, რაც პანდემია დამთავრდება და სწავლა კლასებში აღდგება.
