ბათუმის საკრებულო მერიას ავალებს, 2020 წლის 31 დეკემბრამდე შეიმუშაოს ქალაქის ტერიტორიაზე „გარე ვაჭრობის, ბაზრებისა და ბაზრობების რეგულირების ახალი წესი, რომლითაც მოწესრიგდება გარე ვაჭრობის ადგილების განსაზღვრის, საზოგადოებრივი სივრცეების სარგებლობის, გარე ვაჭრობის დროს მუნიციპალიტეტის საკუთრებაში არსებული ქონების სარგებლობისთვის ქირისა და სხვა აუცილებელი საკითხები.“
საკრებულოს 30 ივნისის დადგენილებით, გარევაჭრობასთან დაკავშირებით ახალი წესი ბათუმის მერიას 2 სექტემბრამდე უნდა შეემუშავებინა, თუმცა საკრებულომ ეს ვადა გადაწია.
საკრებულოს ივნისის გადაწყვეტილებით, გარემოვაჭრეები ბათუმში გათავისუფლებულნი არიან გარე ვაჭრობის უფლების საფასურის გადახდის ვალდებულებისგან.
გარემოვაჭრეები გადასახადებს საკრებულოს მიერ ახალი წესის დამტკიცებამდე აღარ გადაიხდიან, ვინაიდან „ქალაქ ბათუმის მუნიციპალიტეტის ტერიტორიაზე გარე ვაჭრობის უფლების საფასურის განსაზღვრის შესახებ“ საკრებულოს 2020 წლის 25 თებერვლის შესაბამისი დადგენილება ძალადაკარგულია.
ეს დადგენილება აწესრიგებდა და ადგენდა ბათუმში პროდუქტებით, სუვენირებით და სხვა საქონლით ვაჭრობის, რესტორნების, კაფე-ბარების, და სხვა საზკვების ობიექტების წინ სავაჭრო-სარეალიზაციო დანიშნულების ნივთების: მაგიდა სკამები, საჩრდილობელი თუ სხვა სავაჭრო ინვენტარის, ჯიხურების, სწრაფი გადახდის აპარატების, ატრაქციონების და ა.შ განთავსების საფასურს.
