„ვწუხვარ და ყოველდღე, როცა შემოვდივარ, მართლა ძალიან მაწუხებს. ეს ახალგაზრდები აგრძელებენ სხვადასხვა ფორმით პროტესტის გამოხატვას,“ – აღნიშნა თორნიკე რიჟვაძემ, აჭარის მთავრობის თავმჯდომარემ დღეს, 17 ოქტომბერს, გამართულ ბრიფინგზე.
აჭარის მთავრობის სახლთან გრძელდება პანდემიის დროს უმუშევრად დარჩენილი ადამიანების საპროტესტო აქცია. მეორე დღეა შიმშილობს 8 ადამიანი.
თორნიკე რიჟვაძის თქმით, ამ დღეებში ჯამში 954 უმუშევრად დარჩენილი ადამიანის განაცხადი შევიდა აჭარის მთავრობაში.
„ჩვენ მივმართეთ საქართველოს მთავრობას, ეროვნულ ბანკს და იმ მანდატის ფარგლებში, რაც აქვს აჭარის მთავრობას, ვაკეთებთ ყველაფერს, რომ ამ ადამიანებს დავეხმაროთ. იცით, რომ ეს არის იმდენად დიდი სისტემური პრობლემა, რომ ვერ წყდება ერთ დღეში, ორ დღეში და ასე შემდეგ,“ – თქვა თორნიკე რიჟვაძემ.
უმუშევრად დარჩენილებმა საპროტესტო აქცია გასულ კვირას, 6 ოქტომბერს დაიწყეს. საპროტესტო აქციის მონაწილეები ითხოვდნენ: საბანკო სესხების გადავადებას, ტრანსპორტის მოძრაობის აღდგენას, უმუშევრობის კომპენსაციის შენარჩუნებას და, ასევე, უმუშევრობის კომპენსაციის ოდენობის გაზრდას. ოქტომბერი ბოლო თვეა, როცა ეს ადამიანები კომპენსაციას მიიღებენ.
გასულ კვირას აქციის მონაწილეებს აჭარის მთავრობის თავმჯდომარე დაჰპირდა, რომ მათ პრობლემებს ინდივიდუალურად კვირის ბოლომდე შეისწავლიდნენ.
