Batumelebi | რა აწუხებს ხალხს აჭარაში? – გამოკითხვა რა აწუხებს ხალხს აჭარაში? – გამოკითხვა – Batumelebi
RU | GE  

რა აწუხებს ხალხს აჭარაში? – გამოკითხვა

„დემოკრატიული ჩართულობის ცენტრების ქსელმა“ საქართველოს რეგიონებში გამოკითხვა ჩაატარა.  გამოკითხვისას მოსახლეობას ჰკითხეს, რა პრობლემები აწუხებდათ და რის მოგვარებას ელოდნენ პოლიტიკური პარტიებისგან.

აჭარაში, ისე როგორც სხვა კუთხეებში, გამოკითხვა ფოკუს ჯგუფებთან ჩატარდა. შეხვედრებზე გამართული დისკუსიების შედეგად, მთელი რიგი საკითხები გამოიკვეთა.

გამოკითხულებმა მთავარ საკითხად სიღარიბე და უმუშევრობა დაასახელეს.  აღმოჩნდა რომ:

  • თურქეთში სეზონური სამუშაო იყო სასიცოცხლოდ მნიშვნელოვანი ბევრი ოჯახისთვის;
  • პანდემიამ სეზონური შრომითი მიგრაცია გააჩერა და სიღარიბე გაამწვავა;
  • ერთჯერადად გაცემული დახმარება არასაკმარისია ოჯახებისთვის.

ილუსტრაცია „დემოკრატიული ჩართულობის ცენტრების ქსელის“ მიერ გამოქვეყნებული გამოკითხვიდან

პრობლემურ საკითხად დასახელდა განათლების სისტემის გაუმართაობა. კერძოდ, გამოკითხულებს არ აკმაყოფილებთ, საჯარო სკოლებში უსაფრთხოებისა და განათლების ხარისხი. რეგიონში არის საჯარო საბავშვო ბაღების დეფიციტი.

გამოკითხულებმა მნიშვნელოვან პრობლემად დაასახელეს ჯანდაცვის ხელმისაწვდომობა და მისი ხარისხი.

  • „სამედიცინო მომსახურებით ბოლოს როდის ვისარგებლე, ვერ ვიხსენებ, რადგან ძალიან ძვირია,“ – 46 წლის ქალი, უმუშევარი.
  • „ვინც კი მაღალ ქულებს იღებს [მისაღებ გამოცდებზე], ყველა თბილისში მიდის, იმიტომ რომ აქ ვერ მიიღებს განათლებას, ხარისხიან განათლებას,“ – 52 წლის კაცი, დასაქმებული.
  • „უფრო ნაცნობებს და სანათესავოს ნიშნავენ თავისუფალ ადგილებზე. ქობულეთში, ხელვაჩაურში – კიდევ უფრო მეტად. ცოლისძმებს, ახლო ნათესავებს და ივსება ამასობაში თავისუფალი ადგილები,“ – 29 წლის ქალი, დასაქმებული.
  • „ქობულეთში წყალმომარაგების სისტემაში ოთხი მილიონი ლარი დაიხარჯა, თუმცა სასმელი წყლის მიწოდება კვლავ პრობლემად რჩება. მოსახლეობას მღვრიე წყალი მიეწოდება და დასალევად საშიშია,“ – 52 წლის კაცი, უმუშევარი.
  • „რამდენი კორპუსი აშენდა ბათუმში, რომელიმეს თუ აქვს ეზო? არც ერთს თითქმის. მუნიციპალიტეტმა არ უნდა გასცეს ნებართვა, სანამ არ ექნებათ მშენებლებს წარმოდგენილი ისეთი პროექტები, რომლებშიც გათვალისწინებული იქნება ეზოც, მწვანე სივრცეც, პარკინგიც და საბავშვო ზონებიც,“ – 25 წლის ქალი, დასაქმებული.

აჭარაში გამოკითხულთა აზრით, რეგიონში სამედიცინო მომსახურება ძალიან ძვირია და, უკიდურესი მდგომარეობის გარდა, ექიმთან ვერ ახერხებენ მისვლას. გარდა ამის, მეზობელ  თურქეთთან შედარებით, ძვირია წამლები.  მოუწესრიგებელი გზების გამო კი მაღალმთიან დასახლებებში  გართულებულია სამედიცინო დახმარების მიღება.

ილუსტრაცია „დემოკრატიული ჩართულობის ცენტრების ქსელის“ მიერ გამოქვეყნებული გამოკითხვიდან

ასევე, პრობლემად დასახელდა წყლისა და კანალიზაციის გაუმართავი სისტემა. გამოკითხულთა აზრით, სასმელი წყლის მილები ავარიულია, ხოლო წყალი სასმელად უვარგისი. გაუმართავია სანიაღვრე სისტემა და კოლექტორები.

გამოკითხულებმა ცალკე პრობლემად დაასახელეს, ქაოტური განაშენიანება და ურბანული განვითარება. კერძოდ:

  • ძველი ბათუმი მოუვლელია, ისტორიული უბნები ავარიულია და არაფერი კეთდება მათი შენარჩუნებისთვის;
  • დაუგეგმავი და მოუვლელია რეკრეაციული ზონები;
  • საზოგადოებრივი ინფრასტრუქტურა მოუვლელია ან უხარისხო.

მოქალაქეები ყურადღებას ამახვილებენ კორუფციაზე, რომელიც  უხარისხოდ შესრულებულ ინფრასტრუქტურულ სამუშაოებში ვლინდება. ისინი პრობლემად განიხილავენ ნეპოტიზმს საჯარო სამსახურში.

დაუცველობის შიში არის ის, რასაც ასევე პრობლემად განიხილავენ გამოკითხული მოქალაქეები. ეს გამოიხატება ფიზიკური დაუცველობის და სამომავლო მდგომარეობის გაუარესების შიშში. მოქალაქეები ხაზს უსვამენ, რომ არ არსებობს სურსათის ხარისხის კონტროლი, განსაკუთრებით გარე ვაჭრობის პირობებში.

ნეტგაზეთის მასალების სხვა გამოცემებში გადაბეჭდვის წესი
ავტორი