ბათუმში, ქობულეთში, თბილისში, ქუთაისში, გორში, ფოთში, რუსთავსა და ზუგდიდში მოსწავლეები სწავლას დისტანციურად 15 სექტემბერს დაიწყებენ, ხოლო ის სასწავლო დაწესებულებები, რომლებსაც უკვე დაწყებული აქვთ სასწავლო პროცესი, უნდა გადავიდნენ დისტანციურ სწავლებაზე. გადაწყვეტილება ეხება როგორც საჯარო, ისე კერძო სკოლებს და, ასევე, უმაღლეს სასწავლებლებს – ამის შესახებ დღეს, 11 სექტემბერს, განათლების მინისტრის მოადგილემ ეკატერინე დგებუაძემ განაცხადა განათლების სამინისტროში გამართულ ბრიფინგზე.
მისი განცხადების თანახმად, ჩამოთვლილი ქალაქების გარდა, სხვა მუნიციპალიტეტებში სასწავლო პროცესი 15 სექტემბერს დაიწყება საკლასო ოთახებში და, ასევე, აუდიტორიებში.
„განათლების სისტემა მზად არის სასწავლო პროცესი დაიწყოს როგორც საკლასო ოთახში, ასევე დისტანციურად“, – განაცხადა მინისტრის მოადგილემ. მან აღნიშნა, რომ სამინისტრომ მნიშვნელოვანი ნაბიჯები დისტანციური სწავლების პროცესის დასახვეწად და დღეს მზად არიან სასწავლო პროცესი წარიმართოს როგორც საკლასო ოთახში, ასევე დისტანციურად.
„შექმნილია და დამტკიცებულია დისტანციური სწავლების წესი, ასევე, ცვლილება შევიდა ეროვნულ სასწავლო გეგმაში და ორივე დოკუმენტი აქვს მიწოდებული ყველა საჯარო სკოლას. სამინისტრომ უკვე უზრუნველყო სახელმძღვანელოებისა და პირველკლასელებისთვის კომპიუტერების სკოლებისთვის მიწოდება და სკოლები დააორგანიზებენ მოსწავლეებისადმი მიწოდების პროცესს.
ზაფხულის განმავლობაში სამინისტრო ინტენსიურად მუშაობდა პროექტ ტელესკოლაზე და ცხრილის მიხედვით პირველი კლასიდან მე-12 კლასის ჩათვლით უკვე არის ჩაწერილი გაკვეთილები, ასევე ეთნიკური უმცირესობებისთვის გაკვეთილები სომხურ და აზერბაიჯანულ ენებზე ჩაწერილია და დამატებითი საგანმანათლებლო რესურსის სახით პროგრამა გავა ტელესკოლის ფარგლებში“, – განაცხადა ეკატერინე დგებუაძემ.
