საკოორდინაციო საბჭოს გადაწყვეტილებით, სასწავლო პროცესი სკოლებში 15 სექტემბრიდან დისტანციურ რეჟიმში წარიმართება. ამის შესახებ დღეს, 31 აგვისტოს, განაცხადეს. დღეს ითქვა, რომ დისტანციურად სწავლებას, ჯერჯერობით, 4 ოქტომბრამდე მოიაზრებენ.
ანალოგიური რეგულაცია გავრცელდება უმაღლეს და პროფესიულ სასწავლებლებზეც.
მოგვიანებით, განათლების მინისტრმა მიხეილ ჩხენკელმა განმარტა, რომ იმ ქალაქებსა და სოფლებში, სადაც კორონავირუსის დადებითობის მაჩვენებელი 4 პროცენტზე დაბლა იქნება, სწავლა გაგრძელდება საკლასო ოთახებში.
„საქართველოში მოქმედი შტამებდან 80 პროცენტი ფიგურირებს დელტა შტამი, რომელიც განსაკუთრებით დაერია ბავშვებს. ჩვენთვის მთავარია ბავშვების ჯანმრთელობა, ამიტომ ჯანდაცვის უწყებებმა მიიღეს ასეთი გადაწყვეტილება, რომ სწავლა დისტანციურად გაგრძელდეს“, – ამბობს ჩხენკელი.
ჩხენკელის თქმით, გამონაკლისი იქნება მხოლოდ სამედიცინო უნივერსიტეტი, სადაც სწავლა პირდაპირ განახლდება. „გამონაკლისი იქნება მედიცინის უნივერსიტეტის სტუდენტებისთვის პრაქტიკული, ლაბორატორიული და კლინიკური მეცადინეობები“.
საბჭოს გადაწყვეტილებით, 4 ოქტომბრამდე შეზღუდული იქნება სააღმზრდელო დაწესებულებების მუშაობა და „ეს ეხება როგორც სახელმწიფო, ასევე კერძო ბაღებს.“
განათლების მინისტრის, მიხეილ ჩხენკელის განცხადებით, მასწავლებლების 100%-იც რომ იყოს აცრილი, ეპიდემიის გავრცელების მასშტაბებიდან გამომდინარე, სკოლის შენობებში სწავლება მაინც არ განახლდება.
მინისტრის თქმით, დადებითობის მაჩვენებელი 4%-ს თუ არ ჩამოცდება, სასწავლო პროცესი სკოლებში არ განახლდება.
დაავადებათა კონტროლის ეროვნული ცენტრის ხემძღვანელის, ამირან გამყრელიძის ინფორმაციით, ამ კვირაში დადებითობის მაჩვენებელი ჩამოსცდა 10 პროცენტს.
