საავტორო კინოს საერთაშორისო ფესტივალი ბათუმში 13-20 სექტემბერს უნდა გამართულიყო, თუმცა ქვეყანაში შექმნილი ეპიდსიტუაციიდან გამომდინარე კინოფესტივალი გადაიდო, სავარაუდოდ, ოქტომბრამდე.
„ბოლო კვირაში პანდემიური სიტუაციის გაუარესების გამო გადავწყვიტეთ, თარიღები შევცვალოთ. გავიარეთ კონსულტაცია შესაბამის დაწესებულებებთან და მათი რჩევების გათვალისწინებით გადავწყვიტეთ, რომ ბათუმის კინოფესტივალის თარიღები შეიცვალოს. ამ ეტაპზე განვიხილავთ ოქტომბრის პირველ ნახევარს“, – განაცხადა ზვიად ელიზიანმა, კინოფესტივალის მენეჯერმა.
მისივე განცხადებით, უცვლელი რჩება კინოფესტივალის პროგრამა.
ბათუმში კინოფესტივალი, ტრადიციულად, სექტემბერში იმართება. კინოფესტივალის თარიღი მხოლოდ ერთხელ შეიცვალა, 2008 წელს, რუსეთ-საქართველოს ომის გამო, როცა ფესტივალი სექტემბრის ნაცვლად ოქტომბერში გაიმართა.
