Batumelebi | 66 ათასი ლარი დროშებისა და ალმების შესაძენად – ბათუმის მერიის ტენდერი 66 ათასი ლარი დროშებისა და ალმების შესაძენად – ბათუმის მერიის ტენდერი – Batumelebi
RU | GE  

66 ათასი ლარი დროშებისა და ალმების შესაძენად – ბათუმის მერიის ტენდერი

ბათუმისთვის დროშების შესაძენად (მონტაჟითა და დემონტაჟით), მერიის მუნიციპალური სერვისების სააგენტომ ტენდერი გამოაცხადა. სატენდერო თანხა 66 457 ლარია.

დროშებისა და ალმების მიწოდება და შესაბამისი მომსახურება ტენდერში გამარჯვებულმა ხელშეკრულების გაფორმებიდან 2020 წლის 31 დეკემბრის ჩათვლით პერიოდში უნდა უზრუნველყოს.

მომსახურება სატენდერო პირობებით:

  • ალმების ტარებით (ზომა 0,9 სმ) დამზადება ატლასის ნაჭრით, ზომა 0,7X0,5 მ-ზე. მოხდება სადღესასწაულო დღეებში გამოფენა, შემდგომი დემონტაჟი;
  • სტანდარტული სახელმწიფო დროშები შეიკერება ატლასის ნაჭრისაგან ზომით 1,5X1,0 მ-ზე სამაგრი საყურეებით. მოხდება ფლაგშტოკებზე მონტაჟი, ღონისძიებების დამთავრების შემდეგ დემონტაჟი და დასაწყობება ქ. ბათუმში აეროპორტის გზატკეცილი N257;
  • წრიულების მრგვალი სადგარებისათვის (დროშის ტარის ზომა: 3,4 სმ) არასტანდარტული სახელმწიფო დროშები შეიკერება ატლასის ნაჭრისაგან ზომით (2,0X1,0) მ-ზე. მოხდება შეკერილი დროშების არსებული ლითონის ტარებზე დაყენება და ადგილებზე გამოფენა. მოხდება ღონისძიებების დამთავრების შემდეგ დემონტაჟი და დასაწყობება;
  • დიდი ზომის სახელმწიფო დროშები შეიკერება ნავმისადგომთან არსებული მაღლივი ფლაგშტოკებისათვის ატლასის ნაჭრისაგან ზომით 9,0X6,0მ-ზე. მოხდება ადგილზე მონტაჟი მთელი წლის განმავლობაში;
  • გაუთვალისწინებელ შემთხვევებში (დღესასწაულები, საზეიმო ღონისძიებები და ა.შ.) მიმწოდებელმა უნდა შეასრულოს ხელშეკრულების ფასის ფარგლებში შემსყიდველის დაკვეთიდან არაუმეტეს 24-48 საათის განმავლობაში ხელშეკრულებით გათვალისწინებული ან/და ანალოგიური სახის დამატებითი სამუშაოები, არაუმეტეს 6 შემთხვევისა.

სააგენტო სულ 3 255 ცალ სხვადასხვა ზომის დროშას და ალამს შეისყიდის:

ტენდერი მერიის სააგენტომ 2020 წლის 7 აგვისტოს გამოაცხადა, წინადადებების მიღება კი, 26 აგვისტოს დასრულდება.

—-

შემოსავლების შემცირების გამო აჭარის მუნიციპალიტეტებში, მათ შორის ბათუმში, ზოგიერთი პროგრამა და ღონისძიება მიმდინარე წელს გაუქმდა ან გადაიდო; ბევრი პროექტი კი წელს ვერ დასრულდება. პანდემიის გამო შემოსავლების კუთხით ბათუმის ბიუჯეტი მილიონობით ლარს კარგავს, თუმცა ბიუჯეტის კორექტირებული ვარიანტი ბათუმის მერიას საკრებულოში ამ დრომდე არ გადაუგზავნია.

ამ თემაზე:

გონიო-კვარიათის სანაპიროს მოწესრიგებას ბათუმის მერია ზაფხულის ბოლოს გეგმავს

 

მთავარი ფოტო: ბათუმის მუნიციპალიტეტის შენობაზე დროშები დაშვებულია / 08.08.2020 წელი /
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com