საზღვაო აკადემიიდან გაათავისუფლეს ლექტორი, რომელმაც კოლეგები პლაგიატში დაადანაშაულა

ბათუმის საზღვაო აკადემიიდან გაათავისუფლეს ასოცირებული პროფესორი ვაჟა ანანიძე, რომელმაც კოლეგები, მათ შორის, აკადემიის რექტორი პლაგიატში დაადანაშაულა. პლაგიატი შესაბამის ორგანოებს ჯერ არ დაუდასტურებიათ, თუმცა მანამდე აკადემიამ თავიდან მოიშორა პროფესორი, რომელმაც პლაგიატის სავარაუდო ფაქტების შესახებ მედიას ინფორმაცია მიაწოდა.

„მე მიზეზებზე ვერ ვისაუბრებ, რადგან ეს პირად ინფორმაციას შეიცავს, ამიტომ არ მინდა გავასაჯაროვო. ეთიკის კომისიის სხდომები იყო დახურული. ბატონ ვაჟას გადაეცა ბრძანება და ეთიკის კომისიის გადაწყვეტილება. მეტი ინფორმაციის მოწოდება არ შემიძლია,“ – გვითხრა საზღვაო აკადემიის რექტორმა, ირაკლი შარაბიძემ.

საზღვაო აკადემიის ეთიკის კომისია, რომელსაც რექტორი ხელმძღვანელობს, პირველად 23 ივნისს შეიკრიბა. „ეს არის დევნა… ყველა პროცედურა დაარღვიეს, რის დარღვევაც შეიძლებოდა. ყველაზე მთავარი ალბათ იყო ის, რომ ვისაც ვედავებით დარღვევებს, ის იხილავდა ამ საქმეს და არათუ იხილავდა, არამედ კომისიის თავმჯდომარეა“, – ასეთი იყო ანა ბერძენიშვილის შეფასება ეთიკის კომისიის მუშაობაზე. ანა ბერძენიშვილი „საერთაშორისო გამჭვირვალობა საქართველოს“ იურისტია და ვაჟა ანანიძის ინტერესებს ამჯერად სასამართლოში დაიცავს.

ანა ბერძენიშვილის შეფასებით, საზღვაო აკადემიამ დისციპლინური სამართალწარმოების ფარგლებში გამართული სხდომის კანონით განსაზღვრული ყველა წესი დაარღვია.

კანონდარღვევაზე მესამე სექტორის შეფასებებს არ პასუხობს საზღვაო აკადემიის რექტორი. აქაც ირაკლი შარაბიძემ გვითხრა, რომ საქმე პირად ინფორმაციას შეიცავს.

„მე გადმომცეს საქმის მასალები, მაგრამ ეს სრული ბოდვაა, თითქოს მე სტუდენტებს ვაყენებდი შეურაცხყოფას, რომ ფეხმძიმე გოგოსაც კი ვუყვირე… მტკიცებულებები არ არსებობს, მე მივმართავ სასამართლოს,“ – ამბობს საზღვაო აკადემიიდან გათავისუფლებული ასოცირებული პროფესორი, ვაჟა ანანიძე. იგი ასევე საზღვაო აკადემიის ბიბლიოთეკის სამეცნიერო-კვლევითი და საგამომცემლო საქმიანობის სამმართველოს კოორდინატორი იყო.

გათავისუფლების ბრძანების მიხედვით, ვაჟა ანანიძეს შრომის კოდექსის 37-ე მუხლის დარღვევას ედავებიან – „დასაქმებულის მიერ მისთვის ინდივიდუალური შრომითი ხელშეკრულებით ან კოლექტიური ხელშეკრულებით ან/და შრომის შინაგანაწესით დაკისრებული ვალდებულების უხეში დარღვევა.“

ვაჟა ანანიძემ აკადემიაში დასაქმებული პროფესორ-მასწავლებლების პლაგიატის ფაქტების შესწავლაზე 18 მაისს მიმართა განათლების ხარისხის განვითარების ეროვნულ ცენტრს. აკადემიიდან გათავისუფლებულ ლექტორს ჯერ პასუხი არ მიუღია.

პლაგიატის ფაქტების შესახებ ვკითხეთ საზღვაო აკადემიის რექტორსაც.

„ეთიკის კომისიის გადაწყვეტილება არ უკავშირდება პლაგიატს, ეს არის ჩემი პირადული… ეთიკის კომისიაში არის სულ 15 წევრი… ჩემი პლაგიატი არის ექსპერტების მიერ შემოწმებული, პლაგიატი არის გამორიცხული, მე დავიცავი დისერტაცია 5 წლის წინ, არსებობს ექსპერტთა დასკვნა… მე არ ვაპირებ თავის გამართლების რეჟიმში ვიყო,“ – გვიპასუხა ირაკლი შარაბიძემ.

განათლების ხარისხის განვითარების ეროვნულ ცენტრში „ბათუმელებს“ უთხრეს, რომ საზღვაო აკადამიის პროფესორებთან დაკავშირებულ პლაგიატის საკითხზე, ვაჟა ანანიძეს პასუხს 3 ავისტოს გასცემენ.