2 ათასიდან 25 ათასამდე ლარი გრანტის მიღება შეუძლიათ ქობულეთის, ხელვაჩაურისა და შუახევის სოფლებში მცხოვრებ ადამიანებს მცირე ბიზნესის დასაწყებად ან არსებულის გასავითარებლად. საგრანტო კონკურსს გაეროს განვითარების პროგრამა UNDP-ი აცხადებს. პროექტის პარტნიორი ბათუმის ბიზნესინკუბატორია.
საგრანტო განაცხადის მიხედვით, პროექტი უნდა ეხებოდეს ტურისტული მომსახურების ბიზნესს, მომსახურებისა და საყოფაცხოვრებო სერვისის ბიზნესების აღჭურვას, ასევე მცირე წარმოებას, ხელნაკეთი ნივთების ბიზნესს.
განმცხადებლის მიერ წარმოდგენილი საგრანტო განაცხადის მთლიანი ღირებულების მაქსიმუმ 80% დაფინანსდება, თუმცა გრანტი 25 ათას ლარზე მეტი ვერ იქნება. მაღალმთიან დასახლებაში მცხოვრები პირები კი, პროექტის 85 პროცენტს მიიღებენ გრანტის სახით. მოქალაქის ან იურიდიული პირის მხრიდან თანადაფინანსების უზრუნველყოფა მხოლოდ ფულითაა შესაძლებელი.
პროგრამა ითვალისწინებს მხოლოდ ძირითადი საშუალების შესყიდვასთან ან შექმნასთან დაკავშირებულ ხარჯებს და იგი არ შეიძლება მოიცავდეს, მაგალითად, ხელფასს ან ქირას. უპირატესობა იმ პროექტებს მიენიჭება, რომელთა ბენეფიციარები იქნებიან ქალები ან განსაკუთრებული საჭიროების მქონე პირები. უპირატესობაა ასევე, თუკი შეძლებთ მინიმალურ მაჩვენებელზე მეტით თანამონაწილეობას, ან ინოვაციური მიდგომებია გათვალისწინებული, ან ნაკლებად შეიცავს გარემოსთვის ზიანის მიყენების საფრთხეს.
განაცხადების წარდგენა ბიზნესინკუბატორში www.bbi.ge პირველ ივლისამდეა შესაძლებელი.
