Batumelebi | დღეიდან თერმოსკრინინგს ოჩხამურის მოსახლეობასაც ჩაუტარებენ დღეიდან თერმოსკრინინგს ოჩხამურის მოსახლეობასაც ჩაუტარებენ – Batumelebi
RU | GE  

დღეიდან თერმოსკრინინგს ოჩხამურის მოსახლეობასაც ჩაუტარებენ

ქობულეთის კლასტერის გამო აჭარაში კვლევის არეალი გაფართოვდა. დღეს, 16 აპრილს, როგორც აჭარის ჯანდაცვის მინისტრის მოადგილემ ნინო ნიჟარაძემ თქვა, სოფელ ოჩხამურშიც დაიწყება მოსახლეობის თერმოსკრინინგი.

მისი თქმით, ოჩხამურში კორონავირუსის შემთხვევები ჯერ არ გამოვლენილა:

„თუმცა გვინდა მეტ არეალში ჩავატაროთ თერმოსკრინინგი და დავიჭიროთ ყველა საეჭვო ჩივილების მქონე პაციენტი, ვისაც ჯანმრთელობის ერთჯერადი საყურადღებო დარღვევები მაინც ჰქონია,“ – ამბობს ნინო ნიჟარაძე.

მისი თქმით, სოფელ გვარაში კვლევები დასრულდა, თუმცა გაიზარდა კვლევის არეალი.

„ქობულეთის კლასტერთან ჯამში აღრიცხულია 450 სხვადასხვა რიგის კონტაქტი. აქედან მხოლოდ 29 გვაქვს ლაბორატორიულად დადასტურებული შემთხვევა, 450 პირი კი იმყოფება მკაცრი თვითიზოლაციის პირობებში და მათი ჯანმრთელობის მდგომარეობა არის მეთვალყურეობის ქვეშ.

გარდა ამისა,  თერმოსკრინინგით 7 800-ზე მეტი პირი მოხვდა მეთვალყურეობის ქვეშ და აქედან 25 პირი იყო საყურადღებო, რომელთაგანაც 15 შემთხვევაში გვაქვს უარყოფითი პასუხი. ყველა შემთხვევა რაც ქობულეთშია რეგისტრირებული, არის კლასტერთან ასოცირებული და მოსახლეობის სხვა ჯგუფში  დამატებით საყურადღებო შემთხვევები არ გვაქვს,“ – ამბობს ნინო ნიჟარაძე.

კორონავირუსით ინფიცირების შემთხვევა საქართველოში 336-მდე გაიზარდა. გამოჯანმრთელებულია 74 ადამიანი, სტაციონარში კი 494 პაციენტი იმყოფება.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com