ჯანდაცვის სფეროს მწვავე კრიზისის გარდა მსოფლიო არანაკლებ მძიმე ეკონომიკური კრიზისის მოლოდინშია.
კორონავირუსის პანდემიის შესაჩერებლად მსოფლიო მასშტაბით სოციალურ-ეკონომიკური პროცესების გაჩერებას მილიონობით ადამიანის უმუშევრად დარჩენა მოჰყვება.
ჯანდაცვის მსოფლიო ორგანიზაცია [ჯანმო] აცხადებს, რომ ეს მსოფლიოში პირველი პანდემიაა, რომელიც კორონავირუსის მიერ არის გამოწვეული, თანაც სრულიად ახალი კორონავირუსის მიერ, რაც ნიშნავს იმას, რომ არსებობს კიდევ ბევრი უცნობი ასეთი ვირუსი, ამიტომ სამომავლო გეგმების დასახვისას დიდი სიფრთხილეა საჭირო.
ჯანდაცვის მსოფლიო ორგანიზაციის გადაუდებელი სიტუაციების პროგრამის აღმასრულებელმა დირექტორმა მაიკლ რაიანმა ჯანმოს ბოლო ბრიფინგზე განაცხადა, რომ თუ საკმარისი ინვესტიციები არ ჩაიდება საზოგადოებრივი ჯანდაცვის გაძლიერებაში, მსოფლიო იტრიალებს წრეზე:
„ჩვენ თავი უნდა დავაღწიოთ ვირუსს და როცა შევძლებთ მის კონტროლს, ჩვენ შეგვეძლება დავიცვათ ჩვენი ეკონომიკა. მაგრამ თუ ვიმერყევებთ სოციალურ-ეკონომიკური პროცესების ბლოკირებასა და ვირუსის ცუდად მართვას შორის, ეს ცუდ შედეგს მოგვიტანს.
თუ გვინდა, მივაღწიოთ იმ სიტუაციას, სადაც შეგვიძლია ვიცხოვროთ ამ ვირუსის გვერდით და ჩვენი ეკონომიკა დაუბრუნდეს ჩვეულ რიტმს, უნდა გავაძლიეროთ ჯანდაცვის სისტემა – საამისოდ გვჭირდება ძალიან დიდი ინვესტიციები“.
მაიკლ რაიანის განცხადებით, სოციალურ-ეკონომიკური პროცესების შეჩერებამ ვირუსთან ბრძოლაში უძვირფასესი დრო მოგვაგებინა, რომელიც უნდა გამოვიყენოთ საზოგადოებრივი ჯანდაცვის არქიტექტურის შექმნასა და უფრო პასუხისმგებლიანი საზოგადოების ჩამოყალიბებაში.
„ჩვენ გვჭირდება ძალიან კარგი საინფორმაციო სისტემები, განათლებული, ჩართული და გაძლიერებული საზოგადოება მთელს მსოფლიოში, რომელსაც ეცოდინება, როგორ მოიქცეს, თუ ავად არის, სად მივიდეს, ჰქონდეს წვდომა ექიმთან, მედდასთან ვიზიტზე, ტესტირებაზე, იზოლაციასა და კარანტინზე.
როცა მთავრობები აღადგენენ სოციალურ-ეკონომიკურ აქტივობებს, როცა ხალხი დაბრუნდება სკოლაში, ჯანდაცვის სისტემა უნდა იყოს მზადყოფნაში, რათა დავიცვათ უსაფრთხოების ყველა ქსელი. ჩვენ უნდა გადავწყვიტოთ, რა ზომები უნდა გატარდეს, თუ აუცილებელი გახდება უფრო მეტი ფიზიკური დისტანციის შექმნა. ჩვენ არ გვინდა დავასრულოთ ეს პროცესი ისეთ წრეზე, სადაც ყველაფრის ბლოკირებას შედეგად შესუსტდება პანდემია, შემდეგ კი საჭირო გახდება კვლავ ბლოკირება“.
მაიკლ რაიანმა განაცხადა, რომ სწორედ ეს არის გამოწვევა:
„იქნებ დავბრუნდეთ არა ჩვეულ, იგივე სიტუაციაში, არამედ ვიყოთ უფრო მზრუნველი საზოგადოება, უკეთესი ჯანდაცვის სისტემით, უნივერსალური წვდომით ჯანდაცვაზე, უფრო მეტი სოციალური სამართლიანობით, უფრო გვადარდებდეს ერთმანეთი“ – აღნიშნა მან.
