საქართველოში, გამოცხადებული სოციალური დისტანცირების და ახლა უკვე საგანგებო მდგომარეობის პირობებში, როცა ქალაქში კვების ობიექტები დახურულია, ქუჩაში უამრავი ცხოველი დარჩა საკვების გარეშე.
სიტუაცია ყოველდღიურად მძიმდება, რადგან გარეთ მოქალაქეებიც იშვიათად გადაადგილდებიან და სურსათსაც უფრთხილდებიან.
ბათუმში უსახლკარო ცხოველების მოვლასა და გამოკვებაზე ცალკეული მოქალაქეების გარდა მოხალისეთა ჯგუფი მუშაობს. ისინი აგროვებენ თანხას ძაღლებისთვის საკვების შესაძენად და ავტომანქანის საწვავისთვის, შეძენილი საკვების გასანაწილებლად როგორც ქალაქის ფარგლებში, ისე მის გარეთაც.
მათ შორისაა რენა ფერცელიძე, რომელიც დიდი ხანია ქუჩის ძაღლებზე ზრუნავს.
„კვების ობიექტები დაიხურა, ადამიანები ქუჩაში არ დადიან, ბაზრები დაიხურა. ძაღლები ნაგავში იძიებდნენ საკვებს, ახლა კი ნარჩენებს არავინ აწვდით, პარკებს ჭამდნენო, გოგოებმა დაინახეს.
კარგი იქნება, დაგვეხმარონ საკვების შეძენაში და ჩვენ დავინაწილებთ უბნებში, შეუძლიათ პირდაპირ ზოომაღაზიებს დაურიცხონ და ჩვენ წავიღებთ. მოსახლეობას ვთხოვთ, რომ სახლთან ახლოს გაიტანონ ხოლმე საკვების ნარჩენები, პური და დატოვონ გზის პირებზე. ჩვენი ოთხთათები არიან ძალიან ცუდ დღეში,“ – ამბობს რენა.
ბათუმის მერიაში ამბობენ, რომ საყოველთავო კარანტინის პირობებში, შეჩერებულია ყველა პროგრამა ჯანდაცვის პროგრამების გარდა, მათ შორის ცოტა ხნის წინ დაანონსებული „კუპატას” საპილოტე პროგრამაც, რომლის ფარგლებშიც პირი, რომელიც ქალაქიდან უპატრონო ძაღლს აიყვანს და მათ შესაბამის პირობებში მოუვლის, მერიისგან დაფინანსების სახით ერთ წელში 720 ლარს მიიღებს.
„არსებული ვითარებიდან გამომდინარე, ფაქტია, საკვები გაჭირდა. ეს ცხადია გამოიწვევს გარკვეულ კონფლიქტს. ყველა მუნიციპალიტეტმა უნდა იზრუნოს ამაზე. მუნიციპალიტეტს შეუძლია მოხალისეებს დაახმაროს მანქანა, შესაბამისად აღჭურვოს ისინი დღევანდელი ვითარების გათვალისწინებით (ცხოველებიდან გადადება ადამიანზე ამ ვირუსის არ ხდება).
ძაღლი აგრესიულია ორ შემთხვევაში, როცა მეწყვილეს ეძებს შესაჯვარებლად და როცა შია. როცა სტერილურია ძაღლი, მას პირველი პრობლემა აღარ აინტერესებს, მაგრამ ნებისმიერი მშიერი ძაღლი აგრესიული ხდება,” – ამბობს თინათინ ჭავჭანიძე.
ბათუმელი რენა ფერცელიძე, რომელიც წლებია უსახლკარო ძაღლებზე ზრუნავს, ამბობს, რომ ქუჩის ძაღლები ახლა განსაკუთრებულად ცუდ მდგომარეობაში არიან.
„რეგიონებში განსაკუთრებით მძიმე სიტუაციაა. ვაგროვებთ თანხას მათთვის, რომ მოხალისეებმა ადგილზე შეძლონ საკვების შეძენა და მათი გამოკვება. ძალიან მნიშვნელოვანია ყველას ჩართულობა“.
საკვებით ან თანხით დახმარების მსურველებს შეუძლიათ მოხალისეობრივი ჯგუფის წევრებს დაუკავშირდნენ – ფეისბუქჯგუფში “ოთხთათა მეგობრები“, ან გადარიცხონ “კორმისა” თუ მისი ტრანსპორტირებისთვის საჭირო საწვავის თანხა შემდეგ ანგარიშის ნომერზე: GE33TB7901545062100001, მიმღები: რენა ფერცელიძე. დანიშნულებაში მიუთითეთ – საკვებისთვის.
ცხოველთა დაცვის ასოციაციამ რამდენიმე დღის წინ განცხადება გაავრცელა, სადაც ითხოვენ ქვეყანაში გამოცხადებულ საგანგებო მდგომარეობასთან დაკავშირებით, საჯაროდ გამოქვეყნდეს ცხოველთა მონიტორინგის სააგენტოს სტრატეგიული გეგმა, მისი ძირითადი ფუნქციების გათვალისწინებით.
„დაუშვებელია ამ მომენტისთვის სააგენტოს მუშაობის პარალიზება არა მხოლოდ ცხოველების, არამედ მოსახლეობის ინტერესებიდან გამომდინარე.
მიგვაჩნია, რომ სტერილიზაციის პროცესი უნდა გაგრძელდეს, სტერილიზაციის პროცესის შეჩერება გამოიწვევს უსახლკარო ცხოველების რაოდენობის გეომეტრიული პროგრესიით მატებას, რაც შემდეგ მათი დაძინების საბაბი გახდება, ეს კი, თავის მხრივ, გამოიწვევს ჩვენს სამართლიან პროტესტს,” – წერია განცხადებაში.
