Batumelebi | ხვალ საკონსტიტუციოს ახალ მოსამართლეს ნიშნავენ – კანდიდატის ვინაობას უზენაესი არ ამხელს ხვალ საკონსტიტუციოს ახალ მოსამართლეს ნიშნავენ – კანდიდატის ვინაობას უზენაესი არ ამხელს – Batumelebi
RU | GE  

ხვალ საკონსტიტუციოს ახალ მოსამართლეს ნიშნავენ – კანდიდატის ვინაობას უზენაესი არ ამხელს

ხვალ, 31 მარტს, უზენაესი სასამართლო საკონსტიტუციო სასამართლოს ახალ მოსამართლეს დანიშნავს. პლენუმი დღის სამ საათზე შეიკრიბება.

ვის დანიშვნას აპირებს უზენაესი სასამართლო საკონსტიტუციო სასამართლოს მოსამართლედ? – კანდიდატების ვინაობა უცნობია. უზენაესი სასამართლოს პრესცენტრში გვითხრეს, რომ თავმჯდომარეს ამ დრომდე კონსულტაციები არ დაუსრულებია და ის იმოქმედებს კანონის შესაბამისად.

საკონსტიტუციო სასამართლოს მოსამართლის კანდიდატს უზენაესი სასამართლოს პლენუმს თავმჯდომარე წარუდგენს. მას პლენუმმა უნდა დაუჭიროს მხარი.

რატომ არ ჩათვალა საჭიროდ უზენაესმა სასამართლომ კანდიდატების შესახებ ინფორმაცია მიეწოდებინა საზოგადოებისთვის? – კითხვის პასუხად უზენაესი სასამართლოს პრესცენტრში მხოლოდ ის გვითხრეს, რომ უზენაესი სასამართლო კანონს არ არღვევს.

საგანგებო მდგომარეობის გაუქმებამდე საკონსტიტუიციო სასამართლოს მოსამართლის დანიშვნის პროცედურის გადადებისკენ მოუწოდა უზენაეს სასამართლოს „ახალგაზრდა იურისტთა ასოციაციამ“. ამ ორგანიზაციის შეფასებით: „ეს ქმედება მმართველი გუნდისა და კლანის მიერ სასამართლო ხელისუფლების ორგანოებზე საკუთარი გავლენის კიდევ უფრო განვრცობას ემსახურება,“  – აღნიშნულია საია-ს მიერ გავრცელებულ განცხადებაში.

საია-ში მიიჩნევენ, რომ პანდემიის პირობებში პლენუმის სხდომის ჩანიშვნა გაუგებარია, რადგან შეუძლებელი ხდება დისკუსიის გამართვა და წარმოიშვება „საჯარო მსჯელობის დეფიციტი“.

საკონსტიტუციო სასამართლოში ვაკანსია მას შემდეგ გაჩნდა, როცა მოსამართლე მაია კოპალეიშვილს უფლებამოსილება 2019 წლის დეკემბერში შეუწყდა. იგი უზენაესი სასამართლოს კვოტით იყო დანიშნული. ახალი მოსამართლე უზენაეს სასამართლოს ერთ თვეში უნდა წარმოედგინა, თუმცა სასამართლოს თავმჯდომარე არ ჰყავდა. უზენაესი სასამართლოს თავმჯდომარედ პარლამენტმა ნინო ქადაგიძე 17 მარტს აირჩია.

ნეტგაზეთის მასალების სხვა გამოცემებში გადაბეჭდვის წესი
ავტორი