ხულოდან ბათუმის მიმართულებით მიკროავტობუსები ხვალ, 18 მარტიდან, აღარ იმოძრავებენ. გადაწყვეტილება ამის შესახებ შპს „ხულოს ავტოსერვისმა“ მიიღო. კომპანიაში გვითხრეს, რომ მათ ასეთი მითითება ხულოს მერიისგან მიიღეს. ხულო-ბათუმი-ხულოს ხაზზე ამ კომპანიის 30-მდე მიკროავტობუსი მუშაობს.
„მგზავრების ნაკლებობა ისედაც იყო, ბათუმიდან ხულოში მომავალ მიკროავტობუსში ზოგჯერ 3-4 მგზავრი იყო. ჩვენ გავითვალისწინეთ მერიის რეკომენდაცია და ბათუმის მიმართულებით რეისებს 18 მარტიდან შევწყვეტთ, თუმცა შესაძლოა მუნიციპალიტეტის ტერიტორიაზე სოფლებს მოვემსახუროთ. ამ შემთხვევაში შიდა რეისებზე რაიმე ვირუსის გავრცელების რისკი ალბათ არ არსებობს. თუმცა, საბოლოო გადაწყვეტილებას ხვალისთვის მივიღებთ,“ – გვითხრა შპს „ხულოს ავტოსერვისის“ დირექტორმა ფრიდონ ბოლქვაძემ.
კომპანიის დირექტორის თქმით, მისთვის უცნობია, თუ რა დროით შეაჩერეს მუშაობა: „მერიაში გვითხრეს, რომ დროს, თუ როდის განვაახლოთ მუშაობა, დამატებით გვაცნობებენ“.
ხვალიდან არ იმოძრავებენ მიკროავტობუსები ქედა-ბათუმის მიმართულებითაც:
მთავრობის გადაწყვეტილებით, 18 მარტიდან თბილისში სამარშრუტო ტაქსების გადაადგილება დროებით შეჩერდება. მთავრობის მიერ გავრცელებული ინფორმაციით, ასევე შეიზღუდება საქალაქთაშორისო სამარშრუტო ტაქსების მოძრაობა.
ამის შესახებ დღეს, 17 მარტს, საქართველოს პრემიერ-მინისტრმა გიორგი გახარიამ განაცხადა გუბერნატორებთან შეხვედრისას.
ამ თემაზე:
მთავრობა: იზღუდება საქალაქთაშორისო სამარშრუტო ტაქსების მოძრაობაც
