რა წერია ძმები ფეიქრიშვილების „აფეთქების საქმეში“ და რას ამბობენ დაკავებულები

„გოჩა თავდუმაძემ 2019 წლის ნოემბერში დაამზადა ასაფეთქებელი მოწყობილობის მოქმედებაში მომყვანი ელექტრომოწყობილობა…“ – აღნიშნულია დადგენილებაში პირის ბრალდების შესახებ, რომელიც სუს-ის კონტრდაზვერვის სამსახურის უფროსი პროკურორი, მაია სილაგაძე აწერს ხელს. გოჩა თავდუმაძე ერთ-ერთია იმ 6 ბრალდებულს შორის, რომლებიც სუს-მა 30 იანვარს დააკავა.

გამოძიების ვერსიით, ჯგუფი თბილისში ძმების – გიორგი და დავით ფეიქრიშვილების მკვლელობას ასაფეთქებელი მოწყობილობის გამოყენებით გეგმავდა. დაკავებული 6 პირიდან 4 ბათუმიდანაა – მათ შორის, გოჩა თავდუმაძე, რომელსაც სხვების მსგავსად აღკვეთის ღონისძიების სახით წინასწარი პატიმრობა უკვე შეუფარდეს და სხვებისგან განსხვავებით წარდგენილ ბრალს არ აღიარებს.

გოჩა თავდუმაძეს გამოძიება ასაფეთქებელი მოწყობილობის მართლსაწინააღმდეგო დამზადებასა და გასაღებას ედავება ჯგუფურად. ბრალდების მიხედვით, მას ბათუმში, მეჯინისწყლის დასახლებაში მცხოვრები ნუგზარ ბეჟანიძე დაუკავშირდა და ასაფეთქებელი მოწყობილობის მოქმედებაში მომყვანი დისტანციური მართვის პულტის დამზადება შეუკვეთა. გოჩა თავდუმაძის ადვოკატი კი ამბობს, რომ გოჩამ ადამიანების აფეთქების შესახებ არაფერი იცოდა და მიიჩნია, რომ ნუგზარ ბეჟანიძეს დისტანციურად მოქმედი ასაფეთქებელი მოწყობილობა თევზაობისთვის სჭირდებოდა.

„…ნუგზარ ბეჟანიძემ დაუდგენელ დროსა და ვითარებაში მართლსაწინააღმდეგოდ შეიძინა ფეთქებადი ნივთიერება – ტროტილი, რაც მიეკუთვნება საბრძოლო მასალათა კატეგორიას და შეინახა მის საცხოვრებელ ბინაში – მეჯინისწყლის დასახლება… ნოემბერში როლანდ ბერიძემ იური მჟავანაძესთან ერთად ნუგზარ ბეჟანიძეს შეუკვეთა ორი ცალი დისტანციურად მოქმედი ასაფეთქები მოწყობილობის დამზადება. ნუგზარ ბეჟანიძემ დახმარება სთხოვა მის ნაცნობს – გოჩა თავდუმაძეს და მოწყობილობის დასამზადებლად გადასცა როლანდ ბერიძის მიერ შეძენილი ორი ცალი მობილური ტელეფონი და ოთხი ცალი სიმბარათი,“ – ვკითხულობთ დადგენილებაში პირის ბრალდების შესახებ.

ამავე დადგენილების მიხედვით, მეჯინისწყლის დასახლებაში ნუგზარ ბეჟანიძემ და გოჩა თავდუმაძემ საცდელი აფეთქებაც მოაწყვეს მას შემდეგ, რაც ასაფეთქებელი მოწყობილობის მოქმედებაში მომყვანი ელექტრომოწყობილობა გოჩა თავდუმაძემ დაამზადა.

„…მიუტანა ნუგზარ ბეჟანიძეს მის საცხოვრებელ სახლში, სადაც მიაერთეს ელექტროდეტონატორები და დაამაგრეს ტროტილი და მოახდინეს საცდელი აფეთქება“, – აღნიშნულია დადგენილებაში.

გამოძიების ვერსიით, საბოლოოდ ასაფეთქებლი მოწყობილობა ნუგზარ ბეჟანიძემ გადასცა როლანდ ბერიძეს. დადგენილებაში არ არის ნახსენები, რა ფინანსური სარგებელი მიიღო გოჩა თავდუმაძემ ასაფეთქებელი მოწყობილობის მოქმედებაში მომყვანი მოწყობილობის დამზადებისთვის.

„ის არის მაღალი დონის IT სპეციალისტი, მუშაობს რამდენიმე კერძო კომპანიაში ერთდროულად და ლოგიკურად ამ გარიგებაში მონაწილეობა გოჩას არ დასჭირდებოდა,“ – ამბობს ადვოკატი დავით ჯაფარიძე, რომელიც გოჩა თავდუმაძის ინტერესებს იცავს. მან ბრალდებულის ვერსია გაგვაცნო:

„გოჩა ამბობს, რომ იცნობდა ნუგზარს და მან მართლაც სთხოვა დისტანციური მოწყობილობის დამზადება ვიდეო კამერების დისტანციური ჩართვისთვის. გოჩას მისცეს 120 დოლარი და ავტონაწილებში ნაყიდი პულტით დაამზადა ეს მოწყობილობა. მისი თქმით, იქ არ ყოფილა საუბარი ტროტილზე, მას არ ჰქონია არანაირი ასაფეთქებლი ნივთიერება. როცა მიუტანა ეს პულტი სახლში, უთხრა, იცოდეთ, ბრაკონიერობას თუ აპირებთ, მე არ მომადგეს ვინმეო… მე არ ვიცი, რა ხდება სხვების შემთხვევაში, მაგრამ გოჩა თავდუმაძის საწინააღმდეგო მტკიცებულებები ამ საქმეში არ არსებობს,“ – გვითხრა დავით ჯაფარიძემ.

მტკიცებულებები მოწმეთა ჩვენებებია, ასევე თავად ბრალდებულების გამოკითხვის ოქმები და ჩხრეკის ოქმები – ბრალდების ვერსიით, 2020 წლის 22 ნოემბერს ნუგზარ ბეჟანიძის სახლიდან სამართალდამცველებმა ორი ცალი ტროტილის კოჭა [სულ 150 გრამი] ამოიღეს.

ადვოკატი დავით ჯაფარიძე ამბობს, რომ გოჩა თავდუმაძის წინააღმდეგ საქმეში მხოლოდ ერთი მტკიცებულება არსებობს – ნუზარ ბეჟანიძის ჩვენება.

„გოჩა თავდუმაძე დააკავეს მხოლოდ ნუგზარ ბეჟანიძის ცრუ ჩვენების საფუძველზე, ის ხელს აფარებს რეალურ დამნაშავეებს. მე ველი გამამართლებელ განაჩენს, რადგან უზენაესი სასამართლოს მიერ დამკვიდრებული პრაქტიკის მიხედვით, უნდა არსებობდეს მინიმუმ 2 პირდაპირი მტკიცებულება გამამტყუნებელი განაჩენის გამოსატანად,“ – ამბობს დავით ჯაფარიძე.

ნუგზარ ბეჟანიძე, ასევე როლანდ ბერიძე და იური მჟავანაძე მუშაობდნენ ასლან აბაშიძის და მისი შვილის – გიორგის დაცვის სამსახურში. გოჩა თავდუმაძე კი ასლან აბაშიძის მმართველობის დროს უშიშროების თანამშრომელი იყო ინტერნეტკომუნიკაციების კუთხით. იგი 2004 წელს „ვარდების რევოლუციის“ შემდეგ დააკავეს. მაშინ პოლიცია აცხადებდა, რომ დაკავებულის ავტომანქანის საბარგულიდან ამოიღეს მოსასმენი აპარატურა და ეჭვმიტანილი ქვეყნის საწინააღმდეგო საქმიანობაშია ბრალდებული. საბოლოოდ, ორგანიზებული დანაშაულის წინააღმდეგ ბრძოლის განყოფილებამ თავდუმაძე დრამატულ თეატრსა და სხვა დაწესებულებებში 80 ათასზე მეტი ლარის ღირებულების ვიზუალური კონტროლის, ვიდეოჩამწერი და სხდომების წასაყვანი აპარატურის მითვისებაში დაადანაშაულა. თუმცა ბათუმის საქალაქო სასამართლომ გოჩა თავდუმაძე 2016 წელს გაამართლა.

ამჯერად, ბრალის დადასტურების შემთხვევაში, გოჩა თავდუმაძეს 8-დან 11 წლამდე თავისუფლების აღკვეთა ელის. საქმეს თბილისის საქალაქო სასამართლო განიხილავს.

მთავარი ფოტო: გოჩა თავდუმაძე, ბრალდებული. 

ნეტგაზეთის მასალების სხვა გამოცემებში გადაბეჭდვის წესი
ავტორი