მოსამართლე დავით მამისეიშვილმა 80 საათით საზოგადოებისთვის სასარგებლო შრომა შეუფარდა ქობულეთში მცხოვრებ ქალს ოჯახში ძალადობისთვის. განაჩენის მიხედვით, ქალმა თავის რძალს, ვისთან ერთადაც ცხოვრობდა, „ხელის სახის არეში დარტყმით და ხელის კისერში მოჭერით მიაყენა ფიზიკური შეურაცხყოფა, რის შედეგადაც დაზარალებულმა განიცადა ფიზიკური ტკივილი“.
ძალადობის შემთხვევამდე ოჯახში მისულმა პოლიციელებმა შემაკავებელი ორდერი გამოსცეს და დედამთილს რძალთან კომუნიკაცია აუკრძალეს. მაშინ დაზარალებული ამბობდა, რომ ყოფით პრობლემებზე კონფლიქტი დედამთილსა და მამამთილთან ჰქონდა.
ბრალდებულმა სასამართლოში თავი დამნაშავედ მიიჩნია და სადავოდ არ გახადა პროკურატურის მიერ წარმოდგენილი მტკიცებულებები. პროკურორმა წარმოადგინა ექსპერტიზის დასკვნაც, რომლის მიხედვითაც ქალს აღენიშნებოდა „ნაჭდევები კისრის არეში. დაზიანებები განვითარებულია რაიმე მკვრივი, ბლაგვი საგნის მოქმედებით…“
მოსამართლემ სასჯელის სახით საზოგადოებისთვის სასარგებლო შრომის გამოყენება არჩია, რადგან „აღნიშნული ჩადენილი დანაშაულის სიმძიმის, მისი საზოგადოებრივი საშიშროებისა და ხ.-ს პიროვნების გათვალისწინებით სრულად შეესაბამება სამართლიანობის აღდგენის, ახალი დანაშაულის თავიდან აცილებისა და დამნაშავის რესოციალიზაციის ინტერესს“.
