4 სექტემბერს, გვიან ღამით, ბათუმის საქალაქო სასამართლოს მოსამართლე ნინო სახელაშვილმა წინასწარი პატიმრობა შეუფარდა ანზორ დ. – ს, ხოლო მის ცოლს – გირაო.
ცოლ-ქმარი 2 დღის წინ “ბათუმი პლაზასთან” დააკავეს უაქციზო სიგარეტით ვაჭრობისთვის. დაკავებიდან მალევე ქალი ხელწერილის საფუძველზე გაათავისუფლეს.
ცოლ-ქმრის დაკავებამდე პლაზასთან ფინანსური პოლიცია გამოჩნდა: უაქციზო სიგარეტები უნდა ამოვიღოო. მოთხოვნას ხმაური და დაპირისპირება მოჰყვა. ამ დროს ანზორ დ. ცუდად გახდა და ის სასწრაფო-სამედიცინო სამსახურმა კლინიკაში გადაიყვანა.
კლინიკიდან გამოწერის შემდეგ ანზორ დ. სისხლის სამართლის წესით დააკავეს.
“ბავშვობიდან სტკივა ფეხები, სიარული უჭირს და მაინც მუშაობს… მანამდე “კაჭკაზე” მუშაობდა და ტვირთს ატარებდა,”- გვითხრეს სასამართლოს შესასვლელთან თავმოყრილმა ბრალდებულების ახლობლებმა.
აღკვეთი ღონისძიების საქმის განხილვას მოსამართლე ნინო სახელაშვილმა დაახლოებით საღამოს 9 საათზე დაიწყო.
პროკურატურის ვერსიით, უაქციზო სიგარეტები წერეთლის ქუჩაზე გაჩერებული ავტომანქანიდან ამოიღეს, რომლის ღირებულებაც დაახლოებით 6800 ლარია.
“სოციალურად დაუცველები ვართ, ბათუმში, ნაქირავებში ვცხოვრობთ, ორი მცირეწლოვანი შვილი გვყავს,”- გვითხრა პროცესის დაწყებამდე ბრალდებულმა დალი კ.-მ. მისივე თქმით, მის ქმარს ჯანმრთელობის ქრონიკული პრობლემები აქვთ.
პროკურორმა თავის სიტყვაში ხაზი გაუსვა იმას, რომ აქამდე პასუხისგებაში იყო მიცემული ორივე ბრალდებული: ანზორ დ. გირაოთი იყო გათავისუფლებული, დალი კ.-ს კი, წინა შემთხვევაში საპროცესო გაუფორმეს.
პროკურორ ლევან მურვანიძის თქმით, ბრალდებულებმა თანმხლებ პირებთან ერთად ფიზიკური შეურაცხყოფაც მიაყენეს ფინანსთა სამინისტროს თანამშრომლებს, რომლებიც ადგილზე ჩხრეკის ჩასატერებლად მივიდა.
“როგორ შემოდის ამდენი სიგარეტი უაქციზოდ საზღვარზე? მათი მაფიაა და იმიტომ,”- გვითხრეს ბრალდებულების ახლობლებმა, ვიდრე პროცესი დაიწყებოდა და ქალი ბრალდებული ადვოკატის გვერდით დაიკავებდა ადგილს.
მალევე, კაცი ბრალდებული დასვეს გისოსებით გამოყოფილ ადგილზე.
“არცერთი არ თანამშრომლობს გამოძიებასთან და არ ამბობს, საიდან შემოიტანეს სიგარეტი,”- მიმართა მოსამართლეს პროკურორმა. მან ქალი ბრალდებულოსთვის გირაოს შეფარდება მოითხოვა, კაცისთვის – პატიმრობა.
“საზღვრიდან რომ გადმოხვალ, იქ არის დაყრილი ეს სიგარეტები. რატომ გადმოდის, საიდან გადმოდის? თქვენ რატომღაც თვალს ხუჭავთ”,- პროკურორს მიმართა ადვოკატმა მურმქნ ქამადაძემ.
“თქვენგან არ უნდა ვიღებდე შენიშვნას,”- ადვოკატი შეაჩერა პროკურორმა და ადვოკატიც ოჯახურ მდგომარეპბის აღწერაზე გადაერთო:
“ისინი არ უარყოფენ იმას, რომ უაქციზო სიგარეტებით ვაჭრობენ… არ არის სხვა შემოსავლის წყარო და ამიტომ ვაჭრობენ, ბავშვებს რჩენა უნდათ. მათი შემოსავალი არის მხოლოდ ვაჭრობა, მაგრამ გპირდებით, რომ უაქციზო სიგარეტით ვაჭრობას მართლაც შეეშვებიან.
სად უნდა ნახოს დალი კ.-მ 20 ათასი ლარი, რასაც პროკურორი ითხოვს?”- ისევ პროკურორს მიუბრუნდა ადვოკატი.
პროკურორს რეპლიკა აღარ ჰქონია.
ადვოკატმა რამდენიმე დოკუმენტი მიაწოდა მოსამართლეს, თუმცა ამ დოკუმენტებით, როგორც ამას მოსამართლემ გაუსვა ხაზი, არ დგინდება, რომ ანზორ დ.-ს რაიმე შეზღუდული შესაძლებლობა აქვს.
“იმპლანტი აქვს ჩადგმული ფეხში და ისევ სჭირდება ახალი იმპლანტაცია,”- თქვა ადვოკატმა მურმან ქ.-მ.
“გთხოვთ, გაითვალისწინეთ ჩემი მდგომარეობა,”- მიმართა მოსამართლეს ბრალდებულმა ანზორ დ.-მ.
“აღარ განმეორდება ასეთი რამ”- თქვა ბრალდებულმა დალი კ.-მ.
მოსამართლემ დალი კ.-ს გირაოს სახით 5 ათასი ლარი განუსაზღვრა. პროკურორი ქალი ბრალდებულისთვის 20 ათასი ლარი გირაოს შეფარდებას ითხოვდა.
——-
2 სექტემბერს ფინანსთა სამინისტროს საგამოძიებო სამსახურმა განაცხადა, რომ ბათუმში დააკავეს ერთი ადამიანი, რომელიც მათი განცხადებით „ბათუმი პლაზას“ მიმდებარე ტერიტორიაზე უაქციზო სიგარეტს ყიდდა.
გამოძიება მიმდინარეობს სსკ-ის 200-ე მუხლის მე-2 ნაწილის „ბ“ ქვეპუნქტით – აქციზური მარკის სავალდებულო დართვას დაქვემდებარებული საქონლის აქციზური მარკის გარეშე გამოშვება, შენახვა, რეალიზაცია ან გადაზიდვა. ეს მუხლი სასჯელის სახით 4-დან 6 წლამდე ვადით თავისუფლების აღკვეთას ითვალისწინებს.
ამ თემაზე:
„ბათუმი პლაზასთან“, დაპირისპირების შემდეგ, სიგარეტებით მოვაჭრე კაცი დააკავეს – საგამოძიებო
