რატომ სურს აჭარის ტურიზმის დეპარტამენტს 5,1 მილიონი უტენდეროდ დახარჯოს

აჭარის ტურიზმისა და კურორტების დეპარტამენტი 2020 წელს დაგეგმილი ღონისძიებებისთვის 5 159 800 ლარის ტენდერის გარეშე დახარჯვას აპირებს, რისთვისაც შესყიდვების სააგენტოს განაცხადით უკვე მიმართა. სააგენტო დეპარტამენტს ამ მოთხოვნის დასაბუთებას სთხოვს.

ტურიზმის დეპარტამენტის განაცხადის მიხედვით, 2020 წლისთვის, მათ მიერ დაგეგმილი პრიორიტეტებია „აჭარის, როგორც ტურისტული რეგიონის მარკეტინგი ადგილობრივ და საერთაშორისო ბაზარზე, რაც მოიცავს მისი ტურისტული პოტენციალის წარმოჩენას, ცნობადობის ამაღლებას და რეგიონის პოპულარიზაციას“.

„საერთაშორისო ტურისტულ გამოფენებში, კონფერენციებში, სემინარებში, ფესტივალებსა და სამუშაო შეხვედრებში მონაწილეობა და აჭარის რეგიონის ტურისტული შესაძლებლობების წარმოჩენის მიზნით საზღვარგარეთის ქვეყნებში პრეზენტაციებისა და სხვა სამუშაო შეხვედრების ორგანიზება. ეს არის პიარ აქტივობა, რომელიც ხელს უწყობს რეგიონის წარმოჩენას საერთაშორისო ბაზარზე, მისი ტურისტული პოტენციალის წარმოჩენას და ცნობადობის ზრდას, ასევე საქმიანი ურთიერთობების დამყარებას სამიზნე ქვეყნების ტურიზმის ინდუსტრიის წარმომადგენლებთან, შემდგომი თანამშრომლობის მიზნით“, – აღნიშნულია დეპარტამენტის განაცხადში.

ამავე განაცხადით, „აჭარის ტურიზმისა და კურორტების დეპარტამენტი ასევე ახორციელებს ტურისტულ სერვისში დასაქმებულთა კვალიფიკაციის ამაღლების კუთხით ტრენინგებსა და სხვადასხვა თემატიკის მოკლევადიანი კურსებს. 2020 წელს იგეგმება სხვადასხვა პრაქტიკული სახელმძღვანელოს შექმნა საერთაშორისო დონის პროფესიონალების და ჩვენი მოქმედი პრაქტიკოსი სპეციალისტების მეშვეობით, რაც ხელს შეუწყობს რეგიონში სერვისის დონის ამაღლებას და გახდის უფრო ხელმისაწვდომს მიიღონ მათზე მორგებული მომსახურების სტანდარტი, რაც ავტომატურად აისახება მათი სერვისის ხარისხის ზრდაზე“.

საერთაშორისო გამოფენების და სხვა ღონისძიებების ჩამონათვალი, სავარაუდო ღირებულებით, ნახეთ აქ
საერთაშორისო ტურისტულ გამოფენებში, კონფერენციებში, სემინარებში, ფესტივალებსა და
სამუშაო შეხვედრებში მონაწილეობა – ბიუჯეტი 170 000 ლარი.

დაგეგმილი გამოფენების ჩამონათვალი:
1. ჰოლანდიის ტურისტული გამოფენა „Vakantie Beurs – 2020“ – 3600 ლარი
2. ესპანეთის ტურისტული გამოფენა „FITUR – 2020“ -3900 ლარი
3. ჰელსინკის ტურისტული გამოფენა „MATKA -2020“ -3600 ლარი
4. ლიეტუვას ტურისტული გამოფენა „ADVENTUR 2020“ -17000 ლარი
5. სტამბოლის ტურისტული გამოფენა „EMITT -2020“ -2300 ლარი
6. ლატვიის ტურისტული გამოფენა „BALTOUR -2020“ -2000 ლარი
7. ესტონეთის ტურისტული გამოფენა, „TOUREST-2020“ -17000 ლარი
8. ისრაელის ტურისტული გამოფენა, „IMTM-2020” -3300 ლარი
9. ჰერნინგის ტურისტული გამოფენა, „Danish travel show 2020“ -17000 ლარი
10. გერმანიის ტურისტული გამოფენა, „ITB Berlin -2020“ – 5600 ლარი
11. ბუდაპეშტის ტურისტული გამოფენა, „TRAVEL BUDAPEST -2020“ -17000 ლარი
12. უკრაინის ტურისტული გამოფენა „UІTT – Kiev 2020“ – 2300 ლარი
13. აზერბაიჯანის ტურისტული გამოფენა, „AITF 2020“ – 2600 ლარი
14. ბელორუსის ტურისტული გამოფენა, „LEISURE-2020“ -13500 ლარი
15. ჩინეთის ტურისტული გამოფენა, „ITB CHINA-2019“ -3600 ლარი
16. ყაზახეთის ტურისტული გამოფენა, „KITF – 2020“ -2900 ლარი
17. დუბაის ტურისტული გამოფენა „ATM- 2020” – 4200 ლარი
18. საქართველო, თბილისი „CTF -2020“- 6500 ლარი
19. საქართველო, ბათუმი „EXPO BATUMI -2020“ -5000 ლარი
20. გერმანიის ტურისტული გამოფენა, „IMEX -2020“ – 4200 ლარი
21. საფრანგეთის ტურისტული გამოფენა, „TOP RESA-2020“ – 3900 ლარი
22. ტაშკენტის ტურისტული გამოფენა „TITF – 2020“ -7000 ლარი
23. იაპონიის ტურისტული გამოფენა, „JATA-2020“ -2900 ლარი
24. გაერთიანებული სამეფო „WTM -2020“ – 4900 ლარი
25. ესპანეთის ტურისტული გამოფენა „IBTM -2020“ -5200 ლარი
26. პოლონეთის ტურისტული გამოფენა „PTAK -2020“ -2600 ლარი
ასევე, სხვადასხვა გამოფენებში, კონფერენციებში, სემინარებში, ფესტივალებსა და სამუშაო
შეხვედრებში ორგანიზების მომსახურება.

აჭარის რეგიონის ტურისტული შესაძლებლობების წარმოჩენის მიზნით საზღვარგარეთის
ქვეყნებში პრეზენტაციებისა და სხვა სამუშაო შეხვედრების (ღონისძიების) ორგანიზება –
ბიუჯეტი 100 000 ლარი.

სარეკლამო კამპანიის წარმოება საერთაშორისო ან/და სამიზნე ქვეყნების რეიტინგულ
სატელევიზიო მედია საშუალებებში – ბიუჯეტი 1 400 000 ლარი.

ინტერნეტ რეკლამის წარმოება სამიზნე ქვეყნებში- ბიუჯეტი 1 450 000 ლარი.

გარე რეკლამის, ბეჭდური მედიისა და სხვა სარეკლამო საშუალებებით სამიზნე ქვეყნებში
სარეკლამო კამპანიის წარმოება – ბიუჯეტი 1 100 000 ლარი.

სხვადასხვა სარეკლამო საშუალებით რეგიონის ტურისტული პოტენციალის რეკლამირება –
ბიუჯეტი 425 000 ლარი.

სპეციალური პიარ-მარკეტინგული ღონისძიებისა და აქტივობების ორგანიზება შიდა
ტურიზმის სტიმულირებისთვის – ბიუჯეტი 100 000 ლარი.

რეგიონის საიმიჯო სარეკლამო – საპრეზენტაციო ვიდეო რგოლის დამზადება – ბიუჯეტი 150
000 ლარი.

მაღალი რეზოლუციის, დადგმული, ექსკლუზიური სარეკლამო ფოტო მასალის დამზადება
საერთაშორისო პიარ კამპანიებისათვის – ბიუჯეტი 50 000 ლარი.

ტურიზმის სექტორში დასაქმებულთათვის სხვადასხვა აქტივობის ორგანიზება მომსახურების
ხარისხის ამაღლების კუთხით -ბიუჯეტი 90 000 ლარი.

ერთიანი ონლაინ პლატფორმის შექმნა ტურიზმის სექტორში დასაქმებულთა კვალიფიკაციის
ამაღლებისა და სერვისის განვითარებისათვის – ბიუჯეტი 4800 ლარი.

საინფორმაციო ბროშურებისა (მათ შორის, გიდების სახელმძღვანელოების, საოჯახო
სასტუმრო სახლების სარეკომენდაციო სტანდარტების სახელმძღვანელოს) და სხვა მასალების
მომზადება-ბეჭდვა – ბიუჯეტი 84000 ლარი.

ვებ გვერდის gobatumi.com და აპლიკაციის რედაქტირება და პროგრამული განახლება –
ბიუჯეტი 22000 ლარი.

დომენის visitbatumi.com შესყიდვა – ბიუჯეტი 14000 ლარი.

სულ ბიუჯეტი: 5 159 800 ლარი.

„მიგვაჩნია, რომ სერვისის დონე მომსახურების სფეროში წარმოადგენს ჩვენი რეგიონის და ჩვენი ქვეყნისთვის ერთ-ერთ მნიშვნელოვან გამოწვევას, რომელზეც სახელმწიფო ამ ეტაპზე მუშაობს. ტურიზმი აჭარის რეგიონის წამყანი დარგია. ტურიზმის სფეროს მდგრადი განვითარებისთვის მნიშვნელოვანია სფეროში მომსახურების ხარისხის გაუმჯობესება, დასაქმებულთა კვალიფიკაციის ამაღლება და სერვისის ხარისხის ევროპული სტანდარტების დამკვიდრება. გამომდინარე აქედან, განსახორციელებელი ღონისძიებები, როგორც საერთაშორისო რეკლამის, ასევე მომსახურების სფეროშიც უდავოდ ატარებს სახელმწიფოებრივი და საზოგადოებრივი მნიშვნელობის ხასიათს“, – აღნიშნულია დეპარტამენტის განაცხადში.

შესყიდვების სააგენტომ კი, გუშინ, 10 იანვარს, აჭარის ტურიზმის დეპარტამენტს თავისი მოთხოვნის დაზუსტება და დასაბუთება მოსთხოვა.

„გთხოვთ დაასაბუთოთ, რატომ ვერ მოხდება მომართვაში მითითებული თითოეული CPV კოდით (მათ შორის ინტერნეტმომსახურებები; გასართობი; სხვადასხვა კომერციული და მასთან დაკავშირებული მომსახურებები; ქსელების, ინტერნეტისა და ინტრანეტის პროგრამული პაკეტები; ბეჭდვა) გათვალისწინებული მომსახურებების და საქონლის შესყიდვა ელექტრონული ტენდერის საშუალებით და რატომ ვერ იქნებოდა შესყიდვები წინასწარ დაგეგმილი. ასევე, გთხოვთ, დააზუსტოთ, რამ გამოიწვია ღონისძიების შეზღუდულ ვადაში ჩატარების აუცილებლობა“, – აღნიშნულია სახელმწიფო შესყიდვების სააგენტოს წერილში.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com