„პოლიციელს ვუთხარი, რომ დემონსტრაციულად დავარღვევდი წესს და შევიდოდი სასაფლაოზე, მაგრამ ტელევიზიები ვიდრე მოვიდოდნენ, დამაკავეს,“ – ამბობს უმაღლესი საბჭოს წევრი „ერთიანი ნაციონალური მოძრაობიდან“ ელგუჯა ბაგრატიონი. ის ადმინისტრაციული წესით დღეს, 2 მაისს, ურეხის სასაფლაოსთან დააკავეს.
2 მაისიდან 4 მაისის ჩათვლით სასაფლაოზე შესვლა აკრძალულია – ჯარიმა 2 ათასი ლარია.
ელგუჯა ბაგრატიონის თქმით, მას პოლიციელებთან კამათი მას შემდეგ მოუხდა, როცა სასაფლაოზე არ შეუშვეს 12 თებერვალს გარდაცვლილი 25 წლის მეხანძრე-მაშველის – თორნიკე კიპაროიძის ქვრივი .
„მე იქ მივედი იმისთვის, რომ მენახა, რა ხდებოდა, ადამიანები მიდიოდნენ, მაგრამ პოლიცია არ უშვებდა. დაღუპული მეხანძრე-მაშველის ცოლის შემთხვევა იყო გამაღიზიანებელი, მე რა ვქნა, ჩემ გამო ხომ არ მომკვდარაო, ეუბნებოდა ხელვაჩაურის პოლიციის უფროსის მოადგილე შოთა ბაღიაშვილი დაღუპულის ცოლს. ის ითხოვდა პასკას დავდებ საფლავზე და მალევე გამოვალო… ვუთხარი პოლიციის უფროსის მოადგილეს, რომ ეს არ იყო სწორი და მე შევიდოდი სასაფლაოზე დემონსტრაციულად. ტელევიზიებს დავურეკე და მათ ველოდებოდი. პოლიციის უფროსის მოადგილე ამ დროს ტელეფონით ესაუბრა ვიღაცას და, როგორც ჩანს, მიიღო დავალება ჩემს დაკავებაზე,“ – ამბობს ელგუჯა ბაგრატიონი.
უმაღლესი საბჭოს წევრის თქმით, მას დაკავების დროს ადვოკატთან დაკავშირების საშუალებაც კი არ მისცეს. პოლიციის განყოფილებაში სამსაათიანი ლოდინის შემდეგ კი, დეპუტატი სასამართლოში გადაიყვანეს.
ელგუჯა ბაგრატიონი მოსამართლე ალექსანდრე გოგუაძემ ხელწერილის საფუძველზე გაათავისუფლა.
დეპუტატის თქმით, მას პოლიციელმა ასე განუმარტა დაკავების მიზეზი: „დარღვევის ჩადენას აპირებდი“.
„მოსამართლეს ვუთხარი, რომ ადვოკატიც კი არ მყავდა, ამიტომ საქმის განხილვა გადაიდო,“ – დასძინა ელგუჯა ბაგრატიონმა.
