„ბათუმობაზე“ „შერატონში“ შეკვეთილ ვახშამში ქალაქის მერიამ ბიუჯეტიდან 70 ათას 200 ლარი დახარჯა.
„ბათუმობა“ 2025 წლის 3 და 4 მაისს გაიმართა, თუმცა, არც მერიამ და არც ბათუმის კულტურის ცენტრმა რესტორნის ხარჯების შესახებ ინფორმაცია „ბათუმელებს“ არ მიაწოდა.
საგადახდო მოთხოვნის დოკუმენტი კულტურის ცენტრმა მხოლოდ 28 მაისს ატვირთა შესყიდვების პორტალზე. ამ დოკუმენტის მიხედვით „ბათუმობა 2025“ -ის ფარგლებში სარესტორნო მომსახურებაში 70 ათას 241 ლარია გადახდილი სააქციო საზოგადოება „ნუროლ ინშაათ ვე თიჯარეთის“ წარმომადგენლობაზე საქართველოში.
ამავე კომპანიისთვის დამატებით ასევე ცალკეა გადახდილი 20 ათას 143 ლარი – „ბათუმობა 2025“ -ის ფარგლებში სასტუმროს მომსახურებაში.
ამ ხარჯების გათვალისწინებით ქალაქის ბიუჯეტიდან „ბათუმობა 2025“-სთვის ჯამში 313 ათასი ლარი დაიხარჯა. აქედან:
- 114 ათასი ლარი – ღონისძიების ორგანიზებაზე
- 109 ათასი ლარი – მომღერლების ჰონორარებში
- 70 ათასი ლარი – რესტორანში
- 20 ათასი ლარი – სასტუმროს ნომრებში
სარესტორნო და სასტუმროს მომსახურებაზე „ნუროლ ინშაათთან“ გაფორმებული ხელშეკრულებები ბათუმის კულტურის ცენტრს შესყიდვების პორტალზე ამ დრომდე არ აქვს ატვირთული. შესაბამისად, კვლავ უცნობია რამდენი პირისთვის დაიქირავეს სასტუმროს ნომრები და ასევე, რამდენი პირი იყო მიწვეული რესტორანში გამართულ ვახშამზე.
ამ თემაზე:
ბათუმის მერია „შერატონში“ გამართული ვახშმობის ხარჯებს არ ასაჯაროებს
მთავარ ფოტოზე: „ბათუმობის“ ვახშამი სასტუმრო „შერატონში“. ფოტო არჩილ გოგიტიძის ფეისბუქის გვერდიდან.
