„ოცნების ქალაქში“ დაპირებული მრავალბინიანი სახლის მშენებლობაზე აჭარის ფინანსთა და ეკონომიკის სამინისტროს ტენდერი ჯერ კიდევ არ გამოუცხადებია. საბოლოო პროექტი და მშენებლობისთვის საჭირო დოკუმენტაცია კი სამინისტროს ერთი თვის წინ უნდა ჰქონოდა. როგორც „ბათუმელებმა“ გაარკვია, სამინისტროს საბოლოო პროექტი დღემდე არ ჩაუბარებია.
„ზუსტდება დეტალები. კომპანიისგან გვაქვს პირობა, რომ დაახლოებით ერთ კვირაში ჩაგვაბარებს საბოლოო პროექტს, რის შემდეგაც გამოვაცხადებთ ტენდერს სამშენებლო სამუშაოების შესყიდვაზე. უკვე მზად გვაქვს ტექნიკური დავალების მონახაზიც“ – განაცხადა „ბათუმელებთან“ ჯაბა ფუტკარაძემ, აჭარის ფინანასთა და ეკონომიკის მინისტრმა.
„სოციალური და სტიქიის შედეგად დაზარალებული ოჯახებისათვის საცხოვრებელი პირობების უზრუნველყოფის“ პროგრამის მიხედვით, აჭარის მთავრობა „ოცნების ქალაქში“ მცხოვრები 1 550 ოჯახის ბინით უზრუნველყოფას გეგმავს. აჭარის მთავრობის მიერ შექმნილმა სამუშო ჯგუფმა კი, 2019 წლის პირველი აგვისტოსთვის, „ოცნების ქალაქში“ მცხოვრები 1 594 ოჯახი აღწერა [ამ ჯგუფს 1 727 ჯიხური/სახლი აქვს აღწერილი „ოცნების ქალაქში].
პროგრამა, რომლის მთლიანი ღირებულება 48 750 000 ლარია, 2019-2022 წლებში უნდა განხორციელდეს.
აჭარის ფინანსთა და ეკონომიკის სამინისტროს, პროექტისა და ხარჯთაღრიცხვის მომზადებაზე, ხელშეკრულება, 2019 წლის 25 მარტს, ტენდერში გამარჯვებულ კომპანია „ინჟარქიტექტთან“ 320 001 ლარზე აქვს გაფორმებული [სატენდერო თანხა 400 ათასი ლარი იყო]. პროექტი 2019 წლის ივნისის ბოლოს უნდა ყოფილიყო მზად.
აჭარის მთავრობა „ოცნების ქალაქში“ მცხოვრებთა ბინებით უზრუნველყოფის პროგრამაზე მუშაობს, პარალელურად კი ბათუმის მერია „ოცნების ქალაქის“ ტერიტორიაზემცხოვრებ ოჯახებს საცხოვრებელი სახლის უკანონო მშენებლობისთვის 3000 ლარით აჯარიმებს. მერიაში „ბათუმელებს“ ისიც უთხრეს, რომ „ამ მოქალაქეებს მხოლოდ 3000-ლარიანი ჯარიმა და საურავი კი არა, შესაძლოა გასამმაგებული ჯარიმაც დაეკისროთ – ამას ითვალისწინებს კანონი, რომელიც ამავე ჯარიმის გაუქმების შესაძლებლობასაც უშვებს“.
მთავარი ფოტო: „ოცნების ქალაქში“ ასაშენებელი საცხოვრებელი კომპლექსი / რენდერი
