“ერთი რამ მინდა გითხრათ: არსად წასვლას ვაპირებ, მე თქვენ დაგასრულებთ… თქვენ დაგასრულებთ საქართველოს მოსახლეობა და ამომრჩეველი. ქუჩის ოპოზიცია ხართ და 2020-ში ქუჩაში დარჩებით”, – ეს განცხადება პრემიერობის კანდიდატმა გიორგი გახარიამ გააკეთა პარლამენტში ენმ-ს ფრაქციასთან შეხვედრაზე.
“რაც შეეხება ყველაფერ იმას რაც აქ ითქვა, ერთმნიშნელოვნად მინდა აღვნიშო, ეს არის ჩვეულებრივი ენმ-ს სახე: ტყუილი, როცა სიმართლის ჩანაცვლება ხდება. ამას თქვენ აკეთებდით არამხოლოდ 9 წელი, ამას თქვენ აკეთებთ დღესაც”, – განაცხადა გახარიამ.
ამის შემდეგ ენმ-ს წევრმა სალომე სამადაშვილმა სხდომის შეწყვეტის ინიციატივა დააყენა, მისი თქმით, გახარია კითხვებზე პასუხის გაცემას არ აპირებდა, რომელიც მათ მანამდე დაუსვეს. ენმ-ს წევრები მანამდე ითხოვდნენ, პარლამენტში შეეშვათ ის აქტივისტები, რომელთა სახელზე დაშვებულია საშვი, თუმცა პარლამენტის გადაწყვეტილებით, მათ საკანონმდებლო ორგანოში უკვე რამდენიმე დღეა, არ უშვებენ. აქტივისტები აღნიშნულს შენობის გარეთ, ე.წ. სირცხვილის კორიდორის ფორმით აპროტესტებენ.
„ქალბატონო სალომე, გირჩევთ თვალიდან ხელი მოიშოროთ და სიმართლეს შეხედოთ თვალებში” – ამ სიტყვებით გიორგი გახარიამ პარლამენტის სხდომაზე სალომე სამადაშვილს მიმართა.
