„ივანიშვილის მიერ „პრეზიდენტად“ გამწესებულმა ზურაბიშვილმა პოლიციელის მკვლელი კრიმინალი შეიწყალა და ამით კიდევ ერთხელ ფეხქვეშ გათელა ჩვენი ქვეყნის ინტერესები და სახელმწიფო ინსტიტუტები,“ – აცხადებს ექსპრეზიდენტი მიხეილ საკააშვილი. იგი სოციალურ ქსელ „ფეისბუქში“ პოლიციელის მკვლელობისთვის გასამართლებული რამაზ დევაძის შეწყალებას გამოეხმაურა.
რამაზ დევაძე პოლიციელის – თარაშ მუკბანიანის მკვლელობისთვის 2015 წელს გაასამართლეს, მას 12 წლით ჰქონდა მისჯილი თავისუფლების აღკვეთა.
„დღეს პოლიციის ოფიცრის შეურაცხყოფა, დამცირება, დაკნინება, პოლიტიკური მიზნებისთვის გამოყენება ყოველდღიური ცხოვრების ნაწილი გახდა. ახლა უკვე, ივანიშვილმა პოლიციელის მკვლელობას აუნთო მწვანე შუქი. პოლიციაზე ხელის აღმართვა სახელმწიფოებრიობის ჩამოშლის პირდაპირი გზაა, რასაც ქართული საზოგადოება, ჩვენ ყველანი ერთად, არც ერთ შემთხვევაში არ დავუშვებთ“, – წერს მიხეილ სააკაშვილი.
საუბარია 2014 წლის 27 დეკემბერს ბათუმში, ღამის კლუბ „ლეგასში“ 22 წლის პოლიციელის მკვლელობაზე. მკვლელობის ღამეს პოლიციელი კლუბში სამსახურებრივ მოვალეობას არ ასრულებდა, თუმცა მას თან ჰქონდა სამსახურებრივი ცეცხლსასროლი იარაღი. ის სწორედ ამ იარაღიდან გასროლით დაიღუპა.
„ბათუმელები“ ღამის კლუბში პოლიციელის მკვლელობის საქმის სასამართლო განხილვებს აშუქებდა. სასამართლო პროცესზე გამოქვეყნებულ ვიდეოჩანაწერში ჩანდა, რომ ღამის კლუბის მეორე სართულზე, კიბის უჯრედთან ახლოს მყოფი თარაშ მუკბანიანი ძალიან მთვრალი იყო და ცეკვავდა გოგოსთან ერთად. ამ დროს რამდენიმე კაცმა გაიარა ზუსტად იმ სივრცეში, სადაც თარაშ მუკბანიანი ცეკვავდა. ეს მოძრაობა თანდათან გადაიზარდა ჩოჩქოლში და შეხლა-შემოხლაში. სწორედ ამ დროს ჩნდება პირველად თარაშ მუკბანიანის ხელში იარაღი…
კადრში ასევე ჩანდა, რომ თარაშ მუკბანიანი იარაღს ადამიანებს უმიზნებდა. ცოტა ხანში კი, რამაზ დევაძეს ის ზურგიდან ჰყავდა შებოჭილი და საფეხურებით პირველ სართულზე ჩაჰყავდა. ამ დროს პოლიციელს იარაღიანი ხელი ისევ თავისუფალი ჰქონდა.
