მიიღებს თუ არა აჭარა სპორტის რეგიონის სტატუსს


აჭარის მთავრობის ცნობით, აჭარას შესაძლოა ევროპის სპორტის რეგიონის სტატუსი მიენიჭოს. ამის შესახებ მთავრობაში გამართულ შეხვედრაზე ითქვა, რომელსაც
აჭარის მთავრობის თავმჯდომარე თორნიკე რიჟვაძე, ბათუმის მერი ლაშა კომახიძე და ევროპის სპორტის ქალაქების ასოციაციის გენერალური მდივანი ჰუგო ალონსო ესწრებოდნენ.

ჰუგო ალონსო. ფოტო: აჭარის მთავრობა

ჰუგო ალონსოს თქმით, აჭარას აქვს პოტენციალი, რომ მიიღოს ევროპის სპორტის რეგიონის წოდება. ასოციაცია მზად არის განიხილოს საკითხი და ბათუმის შემდეგ სპორტის რეგიონის სტატუსი აჭარას მიანიჭოს.

„ბათუმი არის ქალაქი, სადაც ძალიან დინამიურად ვითარდება სპორტი და საერთაშორისო ღონისძიებები მაღალ დონეზე ხორციელდება. აქედან გამომდინარე, კარგი იქნება, თუ ეს პოტენციალი მთელ აჭარაზე გავრცელდება, რაც, თავის მხრივ, ხელს შეუწყობს ეკონომიკის განვითარებას.  იმედი მაქვს, რომ აჭარა მალე გახდება ევროპის სპორტის რეგიონი,“ – განაცხადა ჰუგო ალონსომ, ევროპის სპორტის ქალაქების ასოციაციის გენერალურმა მდივანმა.

ბათუმს ევროპის სპორტის ქალაქის წოდება 2018 წლის 12 აპრილს მიენიჭა.

ACES Europe ევროპულ ქალაქებს ყოველწლიურად ანიჭებს „ევროპის სპორტის დედაქალაქის“, „ევროპის სპორტის ქალაქის“, „ევროპის სპორტის თემისა“ და „ევროპის სპორტის მცირე ზომის ქალაქის“ სტატუსს.

___________

მთავარ ფოტოზე: შეხვედრა აჭარის მთავრობაში. ფოტო: აჭარის მთავრობა

 

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.