აჭარის სანაპიროს გასწვრივ ზღვის წყლის ხარისხის მაჩვენებელი, ისევე როგორც გასულ წელს, ახლაც ნორმის ფარგლებშია. ჩატარებული კვლევების ოფიციალური მონაცემებით, წყლის დაბინძურება ბაქტერიებითა თუ პათოგენებით არ ფიქსირდება.
ზღვის წყლის ტემპერატურა აჭარის სანაპირო ზოლში უკვე +19 გრადუსია, ჰაერი კი უახლოეს დღეებში დღისით +28 გრადუსამდე გათბება. სპეციალისტების თქმით, ბანაობისთვის ყველაზე ოპტიმალურია, როცა ზღვის წყლის ტემპერატურა +20-დან +25-გრადუსამდეა.
ზღვის წყალი, ტრადიციულად, ყველაზე სუფთაა სარფის, კვარიათისა და გონიოს პლაჟებთან, გაცილებით ცუდია [მაგრამ ნორმის ფარგლებში] წყლი ხარისხი ბარცხანის სანაპიროსთან.
„ზღვის წყლის ხარისხობრივი მაჩვენებლები დადგენილია კანონით. მაგალითად, ნაწლავის ბაქტერიების მაჩვენებელი 1 ლიტრ წყალში უნდა იყოს არაუმეტეს 10 000. მიმდინარე თვეში კვარიათსა და სარფში ეს მაჩვენებელი იყო 2 400, ბათუმის ცენტრალურ პლაჟზე ცოტა მეტი, მაგრამ ნორმის ფარგლებში. ყველაზე მაღალი მაჩვენებელი კი რჩება ბარცხანაში, სადაც არაკანალიზებული უბნებია. თუმცა ეს მაჩვენებელი აქაც ნორმის ფარგლებშია,“ – გვითხრა აჭარის გარემოს დაცვის სამმართველოს გარემოს ინტეგრირებული მართვის განყოფილების უფროსმა, ნუგზარ პაპუნიძემ.
მისივე თქმით, „ლაქტოზა დადებითი ნაწლავის ჩხირების მაჩვენებელი ნორმით 1 ლიტრში არ უნდა აღემატებოდეს 5 000-ს. სარფში, გონიო-კვარიათში, მწვანე კონცხსა და ჩაქვში კი ეს მაჩვენებელი არის 600-700; ბათუმისა და ქობულეთის ცენტრალურ პლაჟებზე ცოტა მეტია, თუმცა ნორმის ფარგლებში“.
ნუგზარ პაპუნიძის თქმით, „პათოგენები საერთო [მათ შორის სალმონელა – ეს ვირუსების გამომწვევი ბაქტერიებია] წყალში არ უნდა დაფიქსირდეს და არც ფიქსირდება“.
ზღვის წყლის სინჯებს ლაბორატორიული კვლევისთვის იღებენ კვარიათში, სარფში, ბათუმის „აკვაპარკისა“ და ცენტრალური პლაჟების მიმდებარედ, ასევე ბარცხანის, მწვანე კონცხისა და ქობულეთის [ორ წერტილში] პლაჟების გასწვრივ.
ზღვის წყლის შემადგენლობისა და სიწმინდის შემოწმება და ანალიზი მოიცავს შემდეგ მაჩვენებლებს: ლაქტოზა დადებითი ნაწლავის ჩხირები; ნაწლავის ჩხირის ჯგუფის ბაქტერიები; კოლიფაგი; ფეკალური სტრეპტოკოკები [Streptococcus faecaliss]; ოქროსფერი სტაფილოკოკები [Staphylococcus aureus]; და პათოგენები საერთო [მათ შორის სალმონელა].
აჭარის სანაპიროს გასწვრივ ზღვის სეზონზე – ივნისიდან სექტემბრის ჩათვლით, ზღვის წყლის სინჯს ყოველთვიურად 24-ჯერ აიღებენ.
ზღვის წყლის სინჯის აღება / სამმართველოს ფოტო
აჭარის გარემოს დაცვისა და ბუნებრივი რესურსების სამმართველოს ინფორმაციით, გარემოსდაცვითი ქვეპროგრამის „ატმოსფერული ჰაერის, ჩამდინარე და ზედაპირული წყლების ხარისხობრივი მაჩვენებლების მონიტორინგის“ ფარგლებში 2019 წელს დაგეგმილია 105 ჩამდინარე წყლის სინჯის გამოკვლევა.
„ანალიზის შედეგად ჩამდინარე წყალში ისაზღვრება შეწონილი ნაწილაკები, საერთო ფოსფორი, ჟანგბადის ბიოლოგიური მოხმარება (ჟბმ), ჟანგბადის ქიმიური მოხმარება (ჟქმ) და წყალბადის მაჩვენებელი (pH). ამ დროისათვის გამოკვლეულია ჩამდინარე წყალი თებერვალში (8 სინჯი), მარტში (10 სინჯი), აპრილში (10 სინჯი), მაისში (10 სინჯი). მაისის თვეში გამოკვლეულ იქნა 10 ჩამდინარე წყლის სინჯი შემდეგ ტერიტორიებზე: აეროპორტის გზატკეცილი, ხახულის ქუჩა, ფრ. ხალვაშის ქუჩა, ა. შანიძის ქუჩა, ოპიზრების ქუჩა, ბაქოს ქუჩა, ბათუმის ქუჩა“, – აღნიშნულია სამმართველოს ინფორმაციაში.
ნუგზარ პაპუნიძის ინფორმაციით, მიმდინარე წელს ჩამდინარე წყლების დაბინძურების 20-მდე ფაქტი დაფიქსირდა, რის შესახებაც ინფორმაცია მიწოდებულია შესაბამისი უწყებისთვის.
აჭარაში ზაფხულის საზღვაო ტურისტული სეზონი ოფიციალურად 15 ივნისს, „ზაფხულის ფესტივალით“ გაიხსნება. ფესტივალის სლოგანია – „ზაფხული იწყება აქ“. უცვლელია ფესტივალის ჩატარების ადგილიც. ფესტივალი წელსაც ანბანის კოშკის მოპირდაპირედ, ზღვის სანაპიროზე ჩატარდება.
ამ თემაზე:
https://batumelebi.netgazeti.ge/news/201919/
