ბანაობისთვის აკრძალული ადგილები აჭარის სანაპიროზე

აჭარაში, ზღვის სანაპირო ზოლში არის გარკვეული ადგილები, სადაც ზღვაში ბანაობა აკრძალულია. ასევე არის ადგილები, სადაც ბანაობა არ არის რეკომენდებული.

ბათუმში ბანაობისთვის აკრძალულ ადგილებს წელს ბარცხანის სანაპიროც დაემატა, სადაც ხელოვნურ კუნძულს აშენებენ. მშენებლობის გამო კი აქ პლაჟი უკვე აღარც არსებობს.

ხელოვნური კუნძულის მშენებლობის გამო ბარცხანაში პლაჟი აღარ არსებობს / 3.07.2024

მიუხედავად სამშენებლო სამუშაოებისა ბარცხანაში მაინც ბანაობენ / 3.07.2024

მშენებლობის მიუხედავად ბარცხანის სანაპიროზე მაინც ბანაობენ.

„ბათუმელები“ შინაგან საქმეთა სამინისტროს საგანგებო სიტუაციების მართვის სამსახურისგან ელოდება ინფორმაციას, არის თუ არა ბანაობა ოფიციალურად არარეკომენდებული ან აკრძალული ბარცხანის დასახლების ზღვისპირა ზოლში და ვინ არის პასუხისმგებელი აქ შესაბამისი გამაფრთხილებელი ბანერების განთავსებაზე.

ადგილები აჭარის სანაპიროზე, სადაც ზღვაში ბანაობა აკრძალული ან არარეკომენდებულია

ზღვაში ბანაობა აკრძალულია:

სარფში, ზღვაში არსებული კლდის მიმდებარედ
სარფში, წმ. ანდრია პირველწოდებულის ჩანჩქერის მოპირდაპირე ზღვის სანაპირო ზოლში
კვარიათის სანაპირო ზოლის დასასრულს, სადაც იწყება კლდეები
ქალაქ ბათუმის ნავსაყუდელის ტერიტორიის მიმდებარედ ზღვის სანაპირო ზოლში
მახინჯაურის სანაპირო ზოლზე განთავსებული სამაშველო სამეთვალყურეო კოშკურის მოპირდაპირედ
მწვანე კონცხის სანაპირო ზოლში კლდეებთან
სასტუმრო „კასტელო-მარეს“ მიმდებარედ
ციხისძირის სანაპირო ზოლში კლდეებთან
მდ. კინტრიშისა და ზღვის შესართავთან [მარჯვენა და მარცხენა მხარეს]

ზღვაში ბანაობა არარეკომენდებულია:

კვარიათი-სარფის საზღვართან საზღვაო სანაპირო მონაკვეთზე
მწვანე კონცხი-ბოტანიკური ბაღის სანაპირო მონაკვეთზე
ციხისძირის სანაპირო ზოლში – სასტუმრო „კასტელო-მარეს“ მიმდებარე ტერიტორიიდან ქობულეთის მიმართულებით, სადაც სანაპირო ზოლი ძირითადად არის კლდოვანი
ასევე არ არის რეკომენდებული ბანაობა მდინარეების [ჭოროხი, ჩაქვისწყალი, კინტრიში] და ზღვის შესართავთან, რადგან წყლის დინების სიჩქარე ძლიერია