მთავარი,სიახლეები

12 წლით პატიმრობა ტრეფიკინგისთვის – ბათუმის სასამართლოს განაჩენი

13.02.2019 • 1206
12 წლით პატიმრობა ტრეფიკინგისთვის – ბათუმის სასამართლოს განაჩენი

მოსამართლე გიორგი გრატიაშვილმა 12 წლით თავისუფლების აღკვეთა მიუსაჯა გულრუხ სოლიევას. მას გამოძიება ტრეფიკინგის ჩადენას ედავებოდა. მსჯავრდებული უზბეკეთის მოქალაქეა.

გამოძიების ვერსიით, გულრუხ სოლიევამ უზბეკეთიდან მოტყუებით ჩამოიყვანა საქართველოში გოგო. მსხვერპლმა იცოდა, რომ ის რესტორანში მიმტანად იმუშავებდა. საქმის მასალების მიხედვით, მსჯავრდებულმა საქართველოში ჩამოსული მ.ხ. საცხოვრებლად მოათავსა ბათუმში, ნაქირავებ სახლში, ჩამოართვა უზბეკეთის მოქალაქის პასპორტი და ჩააყენა მონობის თანამედროვე პირობებში. დაზარალებულ ქალს გადაადგილებას უკონტროლებდნენ, სცემდნენ, ემუქრებოდნენ და იძულებით ჩააბეს პროსტიტუციაში.

ბრალის წარდგენამდე გულრუხ სოლიევამ მიმალვა მოახერხა და ბათუმის საქალაქო სასამართლომ მას წინასწარი პატიმრობა დაუსწრებლად შეუფარდა. ბრალის წარდგენიდან დაახლოებით 2 თვეში გულრუხ სოლიევა სამართალდამცველებმა ახალციხეში იპოვეს. დაკავებული ქალი წარდგენილ ბრალს არ აღიარებდა და თავს უდანაშაულოდ მიიჩნევდა.
„ჩვენ ვითხოვდით გამამართლებელ განაჩენს. რეალურად დაზარალებულად ცნობილმა იცოდა, რისთვისაც მოდიოდა ბათუმში და იძულებას ადგილი არ ჰქონია,“ – გვითხრა ადვოკატმა ნუგზარ გრძელიძემ.
სასამართლო ადამიანით ვაჭრობის ამ შემთხვევას დახურულ სხდომებზე განიხილავდა. ადამიანით ვაჭრობის მუხლის მესამე ნაწილი 12-დან 15-წლამდე თავისუფლების აღკვეთას ითვალისწინებს.

 

გადაბეჭდვის წესი


ასევე: