მთავარი,სიახლეები

როგორ ავიყვანოთ ძაღლი ბათუმის ცხოველთა თავშესაფრიდან [ფოტო]

03.02.2019 • 9840
როგორ ავიყვანოთ ძაღლი ბათუმის ცხოველთა თავშესაფრიდან [ფოტო]

თუ ძაღლის აყვანა გსურთ, მაგრამ ძვირადღირებული ჯიშის ლეკვს ვერ ან არ ყიდულობთ, მაშინ დილის ათი საათიდან შუადღის ორ საათამდე, ბათუმში ცხოველთა თავშესაფარს შეგიძლიათ ეწვიოთ აეროპორტის გზატკეცილზე,  № 251-ში, სადაც ძაღლის აყვანას სრულიად უფასოდ შეძლებთ. თანაც თქვენი ოთხფეხა მეგობარი უკვე აცრილიც იქნება.

თავშესაფარში მეტისები, ანუ შერეული ჯიშის ძაღლები ცხოვრობენ. აყვანის პროცედურისას აუცილებელია თან იქონიოთ პირადობის მოწმობა.

ძაღლის აყვანისას მეტი მოთხოვნა ხვადებზეა, თუმცა თუ ძაღლის ჩატარებული აქვს კასტრაცია/სტერილიზაცია, მნიშვნელობა არ აქვს, ძუ იქნება თუ ხვადი. თანაც, ვეტერინარები ამბობენ, რომ ძუ ძაღლს ხშირად უფრო კარგი ხასიათი აქვს, ვიდრე ხვადს.

ცხოველთა თავშესაფარში მცხოვრები ძაღლების ნაწილი ეზოში თავისუფლად დასეირნობს, ნაწილი კი – ვოლიერშია. აქ გვითხრეს, რომ მალე ძაღლებისთვის ახალი ფლიგელის მშნებლობა დასრულდება.

ეს პატარა, ღუნღულა ლეკვები ჯერჯერობით თავშესაფარში ცხოვრობენ დედასთან ერთად. ვოლიერში ყოფნა როცა სწყინდებათ, გადმოძვრებიან და გარემოს სწავლობენ. განსაკუთრებული ცნობისმოყვარეობით მურა ლეკვი გამოირჩევა.

მეტისის ლეკვები. ფოტო: „ბათუმელები, მანანა ქველიაშვილი

ფოტო: „ბათუმელები“, მანანა ქველიაშვილი

ეს პატარა ზომის შავი ძაღლი ძალიან მეგობრულია, დაუძახებ თუ არა, გამორბის და ყურადღებით გიმზერს. ალბათ კარგი ხასიათის გამო, ვოლიერს გარეთ ცხოვრობს და თავისუფლად დასეირნობს თავშესაფრის ეზოში. თავშესაფარში ძაღლის შესარჩევად მოსულმა ერთმა კაცმა შენიშნა, „ზარბაზანას“ ჰგავს, კინოფილმ „მიმინოდანო“.

ფოტო: „ბათუმელები, მანანა ქველიაშვილი

ვოლიერის „ვარსკვლავი“, აქტიური და სერიოზული ახალგაზრდა ხვადი.

ფოტო: „ბათუმელები“, მანანა ქველიაშვილი

ეს თეთრგულა, ძუ მეტისი დაახლოებით ერთი წლისაა. სახელი ჯერ არ აქვს, ცოტა ხანია, რაც თავშესაფარში ცხოვრობს, რამდენიმე დღის წინ სტერილიზაცია ჩაუტარდა. ვოლიერში ყოფნა აშკარად მოსწყინდა, ადამიანების დანახვა ახარებს და აქტიური ყეფითა და კუდის ენერგიული ქიცინით ცდილობს ყურადღების მიქცევას. ვოლიერში მასთან ერთად რამდენიმე ძაღლი დაგვხვდა, თუმცა მათ შორის „მთავარი გმირი“ ეს გახლდათ.  ისეთი აქტიურია, მისი კადრში მოხვედრა იოლი სულაც არ ყოფილა.

ფოტო: „ბათუმელები“, მანანა ქველიაშვილი

ფოტო: „ბათუმელები“, მანანა ქველიაშვილი

ეს „გრეჩკაა“, ასე დაარქვეს მას თავშესაფარში. „გრეჩკა“ მშვიდი და დარბაისელი ძაღლია, უცხოებს არ უყეფს, ყურადღებით ათვალიერებს და ყნოსავს. მეგობრულია, თუმცა როგორც კი მიხვდა, რომ ფოტოს ვუღებდით, დემონსტრაციულად გვაქცია ზურგი.

ფოტო: „ბათუმელები“, მანანა ქველიაშვილი

„გრეჩკა“ და ბაგდანი, თავშესაფრის თანამშრომელი. მეორე მხარეს ე.წ. „ზარბაზანა“ და თავშესაფრის კიდევ ერთი ბინადარი – თეთრი მეტისი

ახლახანს ისადილა, ცოტა მოწყენილი ჩანს.

ფოტო: „ბათუმელები“, მანანა ქველიაშვილი

ფოტო: „ბათუმელები“, მანანა ქველიაშვილი

ეს გრძელცხვირა ძაღლიც მომცრო ზომის მეტისია.

ფოტო: „ბათუმელები“, მანანა ქველიაშვილი

„შეიძლება დღეს გამოჩნდეს ვინმე, ვისაც მოვეწონები და წამიყვანს“. ხუჭუჭა, კოკერსპანიელის მსგავსი ყურები აქვს, აცრილია და სტერილიზებული.

ფოტო: „ბათუმელები“, მანანა ქველიაშვილი

„ჩვენც აქ ვართ!“ – თეთრი, შავხალებიანი დედა-შვილი.

ფოტო: „ბათუმელები“, მანანა ქველიაშვილი

პროფილში ცოტათი დათვსაც ჰგავს, მაგრამ ნამდვილად ძაღლია.

ფოტო: „ბათუმელები“, მანანა ქველიაშვილი

„რომელი უფრო მოგწონვართ?“

ფოტო: „ბათუმელები“, მანანა ქველიაშვილი

ორი შავი და ერთი შავყურა თეთრი ძაღლი.

ფოტო: „ბათუმელები“, მანანა ქველიაშვილი

„მიდიხართ უკვე?“

ფოტო: „ბათუმელები“, მანანა ქველიაშვილი

ბათუმის მიუსაფარ ცხოველთა თავშესაფარი კომპანია CEBEP-ს ეკუთვნის. უკვე მეხუთე წელია ეს კომპანია ბათუმის მერიის მიერ გამოცხადებულ ტენდერს იგებს და ახდენს მიუსაფარი ცხოველების სტერილიცაზია/კასტრაციასა და გეგმიურ ვაქცინაციას.

ამავე თემაზე: „მათ გამიზნულად აზიანებენ ცხელი წყლითა და ზეთით“ – ამბავი ძაღლების თავშესაფრიდან 

გადაბეჭდვის წესი


ასევე: