ბათუმში, ქუთაისსა და თბილისში სამედიცინო ჩანაწერების ელექტრონული სისტემა ამოქმედდა

თბილისის, ქუთაისისა და ბათუმის სტაციონარულ დაწესებულებში დღეიდან, 15 იანვრიდან, სამედიცინო ჩანაწერების ელექტრონული სისტემა ამოქმედდა. ინფორმაციას საქართველოს დევნილთა, შრომის, ჯანმრთელობისა და სოციალური დაცვის სამინისტრო ავრცელებს.

ამ სისტემის ამოქმედებით, აღნიშნულ ქალაქებში მდებარე სამედიცინო დაწესებულება ვალდებულია, პირველ ეტაპზე მხოლოდ სახელმწიფო პროგრამით მოსარგებლე პირის ჯანმრთელობის მდგომარეობის შესახებ ინფორმაცია ელექტრონული ჩანაწერების სისტემაში შეიტანოს.

„აღნიშნული სიახლე საშუალებას აძლევს როგორც ექიმს, ასევე პაციენტს, ნებისმიერ დროსა და ადგილას ჰქონდეს წვდომა სამედიცინო ისტორიაზე, რომელიც მოიცავს ისეთ მნიშვნელოვან ინფორმაციას, როგორიცაა: პაციენტის ანამნეზი, გადატანილი დაავადებები და ჩატარებული სამედიცინო მანიპულაციები, ქრონიკული დაავადებების არსებობა, მედიკამენტების მოხმარება და სხვა. 

აღნიშნული ინსტრუმენტი განსაკუთრებით მნიშვნელოვანია გადაუდებელი შემთხვევების ეფექტიანად მართვის მიზნით პაციენტის შესახებ ინფორმაციის სწრაფად მისაღებად,“ – აცხადებს სამინისტრო.

ელექტრონული სამედიცინო ჩანაწერების წარმოება სავალდებულო ყველა სტაციონარული და ამბულატორიული დაწესებულებისთვის ეტაპობრივად გახდება.

  • 2019 წლის პირველი მაისიდან ჯანმრთელობის დაცვის სახელმწიფო პროგრამების მიმწოდებელი სტაციონარული  ყველა სამედიცინო დაწესებულება ვალდებული იქნება სახელმწიფო პროგრამით მოსარგებლის ჯანმრთელობის მდგომარეობის შესახებ ინფორმაცია გადასცეს ელექტრონული ჩანაწერების სისტემაში;
  • 2019 წლის პირველი სექტემბრიდან ასეთი ვალდებულება ექნებათ ამბულატორიულ სამედიცინო დაწესებულებებს, ხოლო
  • 2020 წლის პირველი იანვრიდან ყველა სტაციონარული და ამბულატორიული სამედიცინო დაწესებულება [გარდა ამბულატორიულად/დღის სტაციონარის პირობებში განსახორციელებელი, მაღალი რისკის შემცველი დერმატოკოსმეტოლოგიური სამედიცინო საქმიანობის/მომსახურების მიმწოდებლებისა] ვალდებული იქნება, აღნიშნულ ელექტრონულ სისტემაში გადასცეს ინფორმაცია ყველა იდენტიფიცირებული პაციენტის ჯანმრთელობის მდგომარეობის შესახებ.

ამ თემაზე:

15 იანვრიდან თქვენი ჯანმრთელობის შესახებ ინფორმაცია ელექტრონულ სისტემაში შეინახება

მთავარი ფოტო: ჯანდაცვის სამინისტროს ფეისბუქგვერდიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com