„ჩემს შვილს ქმარი ეუბნებოდა, რომ უყვარს და ვერ გაშორდება, მუშტი ურტყა“ [ქალზე ძალადობა]


„ჩემს შვილს ქმარმა მუშტი თავში 25-ჯერ ჩაარტყა, მას თავის ტვინის შერყევა აქვს, სისხლჩაქცევები,“ – გვიყვება ოჯახში ძალადობის მსხვერპლი ქალის დედა, რომლის ვინაობასაც არ ვამხელთ. შემთხვევა რამდენიმე დღის წინ მოხდა. ამ დრომდე პროკურატურას ნაცემი ქალისთვის დაზარალებულის სტატუსი არ მიუნიჭებია.

ქალის ინტერესებს „ახალგაზრდა იურისტთა ასოციაცია“ დაიცავს. ბრალდებულ კაცს გამოძიება ამ დრომდე ეძებს.

ნაცემი ქალის დედის მონათხრობის მიხედვით, ცოლ-ქმარი ნოემბრის დასაწყისში დაშორდა ერთმანეთს, რის შემდეგაც ყოფილმა ქმარმა ქალზე ფიზიკურად იძალადა.

„ორი წლის წინ დაოჯახდნენ, მაგრამ დაშორდნენ, შვილი არ ჰყავდათ… ფიზიკურად არ ძალადობდა, მაგრამ ერთად ცხოვრების დროს ავიწროებდა, ემუქრებოდა,“ – გვიყვება ნაცემი ქალის დედა. – „დაშორდნენ, მაგრამ ოფიციალურად ხელი გაწერილი არ ჰქონდათ. ვიფიქრეთ, ახალი წლის მერე მივალთ და მოვაგვარებთ ამ საქმეს-მეთქი. 8 იანვარს ჩემი შვილი სამსახურიდან მუქარით გამოიყვანა და მანქანით უპირებდა გატაცებას. ეუბნებოდა, რომ უყვარს და ვერ გაშორდება. თმებში სწვდა და 25-ჯერ ჩაარტყა თავში მუშტი… ამას თვითმხილველები ჰყავს და იმედი მაქვს, ყველაფერს დაადასტურებენ. წასული მანქანიდან გადმოხტა ჩემი შვილი. ის 25 წლისაა და ახლა ამბულატორიულ მკურნალობას გადის. მუქარები წინა თვეშიც იყო. 25 დეკემბერსაც ტელეფონზე დაურეკა და აიძულა შეხვედროდა. შემაკავებელი ორდერი გამოსცა პოლიციამ და ამის მიუხედავად მაინც იძალადა“.

დაზარალებულის სტატუსის მისაღებად „ახალგაზრდა იურისტთა ასოციაციამ“ პროკურატურას გუშინ, 14 იანვარს, მიმართა. გამოძიება ოჯახში ძალადობის და ადევნების მუხლითაა დაწყებული. დაზარალებულის ოჯახი ასევე ითხოვს ბრალდებულმა თავისუფლების უკანონო აღკვეთის მუხლითაც აგოს პასუხი.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი