ქობულეთში, მუხაესტატეს პოლიციის უფროსის, ბუტა ანთაძის მკვლელობის საქმეზე დღეს, 6 დეკემბერს, სასამართლოს სახალხო დამცველის წარმომადგენელმა გიორგი ჩარკვიანმა მისცა ჩვენება. მან ბრალდებული ბესიკ ტაკიძე დაკავების დღეს ორჯერ ნახა ჯერ აჭარის პოლიციის მთავარ სამმართველოში, შემდეგ – წინასწარი დაკავების იზოლატორში. აღკვეთი ღონისძიების შეფარდების დროს, ბრალდებულმა მოსამართლე გიორგი გრატიაშვილს უთხრა, რომ ის პოლიციელებმა აწამეს. „მას ვიზუალურად აღენიშნებოდა დაზიანებები“, – უთხრა მოსამართლეს დღევანდელ პროცესზე სახალხო დამცველის წარმომადგენელმა.
ქობულეთში, მუხაესტატეს პოლიციის უფროსი მურად [ბუტა] ანთაძე ქობულეთი-მუხაესტატეს საავტომობილო გზაზე 15 ივნისს მოკლეს. ამ დროს ივანიშვილის დენდროლოგიური პარკისთვის მორიგი ხე გადაჰქონდათ. გამოძიების ვერსიით, მკვლელობაში ბრალდებულმა სამზარეულოს დანა ზურგიდან ჩაარტყა პოლიციელს. ბუტა ანთაძე ქობულეთის საავადმყოფოში მიყვანისთანავე გარდაიცვალა.
„ბესიკ ტაკიძემ გვითხრა, რომ ის შეურაცხყო პოლიციის უფროსმა და ამიტომ დაარტყა დანა. შემდეგ გავიქეცი და დაახლოებით 40 მეტრში ჩემით წავიქეციო. იქ მცემეს პოლიციელებმა, შემდეგ მანქანაში ჩამსვეს და ისე მცემეს, გონება დავკარგეო. გონზე როცა მოვედი, უკვე ბათუმში ვიყავი, პოლიციის დეპარტამენტის შენობაშიო…
მას აღენიშნებოდა ვიზუალურად დაზიანებები: სახეზე შეშუპება და სიწითლე, ხელებზე ხელბორკილების ნაკვალევი ჰქონდა, სიშავე და სისხლჩაქცევები. მისივე თქმით, ფეხზე დაზიანებები წაქცევის დროს მიიღო. იმავე დღეს ბესიკ ტაკიძე უკვე წინასწარი დაკავების იზოლატორში ვნახეთ. მან გვითხრა, რომ ჩვენთან შეხვედრის შემდეგ მხოლოდ ერთხელ დაარტყა პოლიციელმა, რამდენჯერ უნდა გცემოთო და შემეშვნენო,“ – ამბობს გიორგი ჩარკვიანი, სახალხო დამცველის რეგიონული დეპარტამენტის აჭარის სამმართველოს მთავარი სპეციალისტი.
სახალხო დამცველმა ბესიკ ტაკიძის დაკავების დღესვე მიმართა პროკურატურას. გამოძიება სამსახურებრივი უფლებამოსილების გადამატების მუხლით დაიწყო, თუმცა ძიება ამ დრომდე არ დასრულებულა. ომბუდსმენის აპარატისთვის უცნობია ექსპერტიზის დასკვნები, რაც ბესიკ ტაკიძეს დაკავების დროს ჩაუტარდა სხეულზე არსებული დაზიანებების კუთხით.
სახალხო დამცველის მონაცემებით, ბესიკ ტაკიძე პენიტენციურ დაწესებულებაში გადაყვანამდე რომელიმე სამედიცინო დაწესებულებაში მკურნალობის მიზნით არ გადაუყვანიათ.
„წინასწარი დაკავების იზოლატორს ჰყავს ექიმი. შესაძლოა, ამ მომსახურებით ისარგებლა ბრალდებულმა,“ – გვითხრა გიორგი ჩარკვიანმა.
სახალხო დამცველის წარმომადგენელი კიდევ ერთი დეტალის შესახებ ყვება.
„დოკუმენტაციის მიხედვით, ბესიკ ტაკიძის დაკავების მომენტიდან ბათუმში ჩამოყვანამდე ორი საათი განსხვავებაა. ჩვენ იმავე დღეს გადავამოწმეთ ქობულეთში და დადასტურდა, რომ ბრალდებული პოლიციის ქობულეთის განყოფილებაში არ მიუყვანიათ“, – აღნიშნავს გიორგი ჩარკვიანი.
ქობულეთში პოლიციის უფროსის მკვლელობის საქმის განხილვა გრძელდება. პროკურატურის მოწმეების ჩვენების მოსმენა უკვე დასრულდა. ამჯერად მოსამართლე დაცვის მხარეებს მოწმეების ჩვენებებს გაეცნობა.
