თორნიკე რიჟვაძემ ექიმებთან შეხვედრაც დახურა – რაზე ისაუბრეს „რესპუბლიკურ საავადმყოფოში“


აჭარის მთავრობაში სხდომების დახურვის შემდეგ თორნიკე რიჟვაძე „რესპუბლიკური საავადმყოფოს“ ექიმებს მედიის გარეშე შეხვდა. აჭარის მთავრობის თავმჯდომარე ექიმებთან სალაპარაკოდ აჭარის ჯანდაცვის მინისტრთან და ბათუმის მერთან ერთად მივიდა.

დახურული შეხვედრის შემდეგ ექიმმა გია კიკაბიძემ „ბათუმელებს“ უთხრა, რომ „რესპუბლიკური საავადმყოფოს“ მშენებლობის დასრულების თარიღი ისევ უცნობია. ექიმებს ასევე სურდათ გაეგოთ, არის თუ არა ბიუჯეტში საკმარისი თანხა სამედიცინო აღჭურვილობის შესაძენად.

„როდის დასრულდება, ზუსტად ვერ გვითხრეს. კონკრეტული თარიღი გაცხადებული არ ყოფილა. მე პირადად ვათვალიერებ მშენებლობას და აქტიურად მიმდინარეობს სამუშაოები, მაგრამ მთავარია აღჭურვა. შეხვედრაზე გვითხრეს, რომ ბიუჯეტში თანხა ამ ეტაპზე არ არის. მთავრობის თავმჯდორემ თქვა, რომ მიმდინარეობს ინტენსიური მუშაობა, რომ აღჭურვისთვის თანხა გამოიძებნოს. შესაძლებელია, ცენტრალური ბიუჯეტიდან მოხდეს ამის დაფინანსება. საწყის ეტაპზე კლინიკის აღჭურვას შესაბამისი ტექნიკით მინიმუმ 30 მილიონი სჭირდება,“ – გვითხრა „რესპუბლიკური საავადმყოფოს“ ექიმმა, გია კიკაბიძემ.

ბათუმში, რესპუბლიკური საავადმყოფოს ტერიტორიაზე ახალი კლინიკის მშენებლობა 2018 წლის 18 მაისს უნდა დასრულებულიყო, შემდეგ ეს ვადა 31 აგვისტომდე გადასწიეს. კლინიკის მშენებლობა ამ დრომდე გრძელდება.

როდის დასრულდება ახალი კლინიკის მშენებლობა? – ამის გასაგებად ჩვენ შპს „სტადიონის“ დირექტორს, ზურაბ ჭურკვეიძეს დავუკავშირდით. მან ჩვენს სატელეფონო ზარს არ უპასუხა. საავადმყოფოს მშენებლობაზე პასუხისმგებელი შპს „სტადიონია“ და იგი აჭარის ფინანსთა და ეკონომიკის სამინისტროს ექვემდებარება.

ექიმებთან გუშინდელი შეხვედრის შესახებ ინფორმაცია აჭარის მთავრობამ დღეს, 29 სექტემბერს გაავრცელა. მთავრობის ინფორმაციით, თორნიკე რიჟვაძემ ექიმებს უთხრა, რომ სახელმწიფო რესპუბლიკური საავადმყოფოს გასხვისებას არ აპირებს. აჭარის მთავრობის თავმჯდომარის თქმით, აღნიშნული მიდგომა განპირობებულია, ერთი მხრივ, ჯანდაცვის სერვისებზე ხელმისაწვდომობით, მეორე მხრივ, სწორედ კონკურენტუნარიანი გარემოს შექმნით, სადაც სახელმწიფო უზრუნველყოფს, როგორც ჯანდაცვის სერვისებზე ხელმისაწვდომობას, ასევე ფასების ადეკვატურობას.

„თორნიკე რიჟვაძემ ექიმებს რესპუბლიკური საავადმყოფოს გასხვისების თაობაზე მთავრობის მტკიცე გადაწყვეტილების შესახებ მიაწოდა ინფორმაცია,“ -აღნიშნულია აჭარის მთავრობის მიერ მედიისთვის მიწოდებულ ინფორმაციაში.

რატომ არ შეატყობინა აჭარის მთავრობამ ექიმებთან შეხვედრის შესახებ ჟურნალისტებს? – აჭარის მთავრობის პრესსამსახურის უფროსმა, სოფო გუჯაბიძემ ამ კითხვაზე გვიპასუხა, რომ ეს იყო სამუშაო შეხვედრა და ექიმებთან მედიის გარეშე გასაუბრებაზე გადაწყვეტილება თორნიკე რიჟვაძემ მიიღო.

„მეც შეხვედრის შემდეგ გავიგე. „ოცნების ქალაქშიც“ მთავრობის თავმჯდომარე მედიის გარეშე მივიდა. თვითონ არჩევს ასე, რომ მთავარია საქმე გაკეთდეს და გადაწყვეტილებები იქნეს მიღებული. შემდეგ ეტაპზე შეიძლება მედიასაც დავუძახოთ,“ – გვითხრა სოფო გუჯაბიძემ.

აჭარის მთავრობის შეხვედრა ექიმებთან.

ამ თემაზე:

რატომ ჭიანურდება ახალი „რესპუბლიკური საავადმყოფოს“ დასრულება

ნეტგაზეთის მასალების სხვა გამოცემებში გადაბეჭდვის წესი
ავტორი