მთავარი,სიახლეები

ერთი დღე ავტომობილის გარეშე – ბათუმში შაბათს ველომსვლელობა გაიმართება

19.09.2018 • 3464
ერთი დღე ავტომობილის გარეშე – ბათუმში შაბათს ველომსვლელობა გაიმართება

22 სექტემბერს, შაბათს, 16:00 საათზე, ევროპის მობილობის კვირეულის ფარგლებში ველომსვლელობა გაიმართება.

ბათუმის მერიის ცნობით, მსვლელობა სტარტს ანბანის კოშკის მიმდებარე ტერიტორიიდან აიღებს და ბათუმის ზღვისპირა პარკის გავლით ახალ ბულვარში მდებარე ამფითეატრთან დასრულდება, სადაც ღონისძიების მონაწილეებს ელექტრონული მუსიკის მოსმენის შესაძლებლობა ექნებათ. მერიის პრესსამსახურის ცნობით, ველომსვლელობაში ბათუმის მერიის თანამშრომლებიც მიიღებენ მონაწილეობას.

ველომსვლელობას ნებისმიერი მსურველი შეიძლება შეურთდეს.

„საერთაშორისო დღე ავტომობილის გარეშე“ 2000 წელს დაარსდა ევროკომისიის მიერ და ევროპასა და მსოფლიოს მრავალ ქვეყანაში აღინიშნება. ღონისძიება მიზნად ისახავს ქალაქის ცენტრალურ უბნებში ნაკლები კერძო ავტომობილის მოძრაობის შედეგად გარემოს მოფრთხილებას, საზოგადოებრივი ტრანსპორტის, ველოსიპედისა და ფეხით სიარულის პოპულარიზაციას.

დღის მთავარი მოწოდებაა – მოქალაქეებმა ერთი დღით თავი შეიკავონ პირადი ავტომობილით სარგებლობისგან, გადაადგილდნენ ფეხით ან გამოიყენონ ალტერნატიული და ჯანსაღი ტრანსპორტი – ველოსიპედი, საზოგადოებრივი ტრანსპორტი.

ღონისძიება პროექტ „მწვანე ქალაქების“ ფარგლებში იმართება და მისი მხარდამჭერები არიან: ბათუმის მერია, გაეროს განვითარების პროგრამა (UNDP) და გლობალური გარემოსდაცვითი ფონდი (GEF), პარტნიორები კი – შავი ზღვის ეკოაკადემია, სითი ინსტიტუტი საქართველო და Critical Mass Batumi. 

გადაბეჭდვის წესი


ასევე: