„ციხის ყოფილი უფროსების“ საქმეზე სასამართლო პროცესი მაისის შემდეგ ისევ არ გამართულა. საქმეს მოსამართლე დავით მამისეიშვილი განიხილავს, რომელმაც საბოლოო გადაწყვეტილება წლის ბოლომდე უნდა მიიღოს. წინააღმდეგ შემთხვევაში, ბრალდებულები სისხლისსამართლებრივი პასუხისმგებლობიდან უნდა გათავისუფლდნენ. საქმეზე დასაკითხია 100-ზე მეტი მოწმე, მორიგი პროცესი კი, ჩანიშნული ახლაც არ არის.
ბათუმის ციხის ყოფილ უფროსებს – გიორგი ვეკუას და ზაზა ჯიქიას პროკურატურა პატიმრების წამებასა და არაადამიანურ მოპყრობაში სდებს ბრალს. ასზე მეტი ნაწამები პატიმრის საჩივრის საფუძველზე ამ საქმის განხილვა ბათუმის საქალაქო სასამართლოში 4 წლის წინ – 2014 წლის 4 მარტს დაიწყო. ბოლო სხდომა ამ საქმეზე მიმდინარე წლის 20 აპრილს გაიმართა, სადაც ყოფილმა პატიმრებმა ციხეში წამების ისტორიების გაიხსენეს.
2018 წლის აპრილამდე ამ საქმეზე სასამართლო პროცესი ერთი წლის განმავლობაში არ ჩატარებულა. შესაბამისად, მოსამართლემ 100 მოწმის მოსმენას წლის ბოლომდე დარჩენილ 4 თვეში უნდა მოასწროს. თუკი საქმეს სხვა მოსამართლე გადაიბარებს, ამ შემთხვევაში მან უკვე დაკითხული მოწმეების ჩვენებებიც უნდა მოისმინოს.
რის გამო არ ინიშნება სხდომა „ციხის ყოფილი უფროსების საქმეზე“? – მოსამართლის თანაშემწე განმარტავს, რომ დავით მამისეიშვილი წინა თვეებში ჯანმრთელობის მდგომარეობის გამო სასამართლოში არ იმყოფებოდა.
დავით მამისეიშვილი ორი კვირის წინ დაბრუნდა სამსახურში და სხვადასხვა საქმეს უკვე განიხილავს. „ამ საქმის განხილვა ამ დროისთვის ჩანიშნული არ არის,“ – გვითხრა მოსამართლის თანაშემწემ.
გიორგი ვეკუა და ზაზა ჯიქია წინასწარ პატიმრობაში არ იმყოფებიან, ისინი ბათუმის სასამართლომ ოთხი წლის წინ, გირაოს სანაცვლოდ გაათავისუფლა.
კანონში შესული ცვლილებების მიხედვით, სასამართლო ვალდებულია 2 წლის ვადაში დაასრულოს იმ საქმის განხილვა, სადაც ბრალდებული წინასწარ პატიმრობაში არ იმყოფება. ეს წესი მხოლოდ იმ საქმეებზე ვრცელდება, რომლის განხილვაც სასამართლომ 2016 წლიდან დაიწყო.
მთავარი ფოტო: „ციხის ყოფილი უფროსების საქმის“ განხილვა. ფოტო „ბათუმელების“ არქივიდან.
