ქობულეთის რკინიგზის სადგურის უფროსმა, ირაკლი კვირკველიამ, მატარებლის დაძვრამდე მცირე ხნით ადრე მატარებელსა და ბაქანს შორის ჩავარდნილი ბავშვი ამოიყვანა. ამის შესახებ „ინტერპრესნიუსის“ რედაქტორმა, თამუნა ნეფარიძემ დაწერა საკუთარ ფეისბუქგვერდზე. შემთხვევა ქობულეთის რკინიგზის სადგურში, გუშინ, პირველ სექტემბერს მოხდა.
„თითქმის ჩამოსული იყო ყველა მგზავრი და წამებში უნდა დაძრულიყო მატარებელი ეს რომ მოხდა. ცოლ-ქმარი იყო სამი ბავშვით, რაღაც მომენტში ზურგით მდგომ ბავშვს ფეხი დაუცურდა როგორც ჩანს და ჩავარდა. ყვირილი რომ ატყდა, საიდანღაც გამოიქცა ეს ბიჭი და ამოიყვანა ბავშვი. მალევე დაიძრა მატარებელი, ისედაც ძალიან ცოტა ხანს ჩერდება მატარებელი ქობულეთში, შეიძლება მატარებლის მძღოლს ვერც გაეაზრებინა რა მოხდა და დაეძრა მატარებელი. არაფერზე არ უფიქრია იმ ადამიანს, დაიძვრებოდა თუ არა მატარებელი, იმ წამშივე ჩახტა და ბავშვი ამოიყვანა“ – გვითხრა თამუნა ნეფარიძემ.
________________
თამუნა ნეფარიძის ფოტო
