24 წლის ტრანსგენდერი ქალი, ლიკა, რომელიც საზოგადოებას მხარდაჭერას სთხოვდა, გუშინ, 19 ივლისს გარდაიცვალა ბათუმის შიდსისა და ტუბერკულოზის ცენტრში. მისი ცხედარი ბათუმის სამხარაულის ბიუროშია ექსპერტიზაზე და ოჯახის წევრის განცხადებით, ლიკას პირდაპირ ექსპერტიზის ბიუროდან გადაასვენებენ სასაფლაოზე, სახლში მისვენების და სამძიმრის გარეშე.
ლიკას ბებია ამბობს, რომ ოჯახი ნაქირავებში ცხოვრობს, გარდა ამისა, ლიკა მძიმედ იყო ავად და მისი სახლში გადასვენება სხვებისთვის შეიძლება შეიცავდეს საფრთხეს. თუმცა, ბათუმის შიდსისა და ტუბერკულოზის ცენტრში „ბათუმელებს“ უთხრეს, რომ რაიმე დაავადების გადადების საფრთხე გამორიცხულია.
ლიკას საავადმყოფოში ძირითადად ბაბუა უვლიდა. „ბაბუას დავურეკე, როცა ძალიან გამიჭირდა და ის მოვიდა, ის მივლის“, – ამბობდა ლიკა.
ლიკას ბაბუა ამბობს, რომ არაფერი იცის ლიკას დაკრძალვის შესახებ, რადგან მას არაფერს ეუბნებიან. „თვენახევარია ვუვლიდი. მანამდე, ხუთი წელი არაფერი ვიცოდი მასზე. თვითონ დამირეკა. ჩემი შვილი და დედამისი გაშორებულები არიან. ჩემს შვილს [ლიკას მამას], რომ დავურეკე, მითხრა, მაგაზე არ დამირეკოო, მის შვილზე. ვეღარ მოვა ეგ ჩემთან“.
ლიკა ჰყვებოდა, რომ ძალადობის მსხვერპლი იყო. მასზე 6 წლის ასაკში იძალადეს მეზობლად მცხოვრებმა ბიჭებმა. ამ დანაშაულისთვის, ლიკას თქმით, არავინ დასჯილა, რადგან დააშინეს და ძალადობის შესახებ მაშინ არაფერი უთქვამს.
ბათუმის შიდსისა და ტუბერკულოზის ცენტრში ამბობენ, რომ ლიკას სიცოცხლის ბოლო დღეებში საავადმყოფოში ლიკას დედა და ბებიაც უვლიდა.
ლიკას ბებიას თქმით, ლიკას კაცის ტანსაცმლით დაკრძალავენ.
ტრანსგენდერი ქალის შესახებ „ბათუმელებმა“ სტატია ორი კვირის წინ მოამზადა.
მთავარ ფოტოზე: ლიკას პალატა, დათუნია, რომელიც ლიკას ბაბუამ აჩუქა. ჯაბა ანანიძის ფოტო
