მთავარი,სიახლეები,სპორტი

14 წლამდე ასაკის მორაგბეები ბათუმიდან

25.03.2018 • 5107
14 წლამდე ასაკის მორაგბეები ბათუმიდან

სარაგბო კლუბ „ბათუმის“ 14-წლამდე ასაკის მორაგბეებმა 24 მარტს გამართულ მატჩში ფოთის გუნდი „კოლხეთის რაინდები“ დაამარცხეს. მიმდინარე საფესტივალო სეზონზე ეს ბათუმის მეორე გამარჯვებაა.

ეს სარაგბო კლუბ „ბათუმისთვის“ პირველი 14 წლამდე ასაკის მორაგბეთა კლუბია, რომელსაც საკლუბო თამაშისთვის ამზადებენ. 2004-2005 წლებში დაბადებული მორაგბეებიდან მწვრთნელები რამდენიმე თვის მანძილზე არჩევდნენ საუკეთესოებს – ვიდეოზე იწერდნენ ვარჯიშებს და ეძებდნენ მოთამაშეებს, რომლებსაც  კარგი მონაცემები ჰქონდათ. საბოლოოდ 14-წლამდე მორაგბეები სამ გუნდად დაჰყვეს – პირველ გუნდში საუკეთესო მოთამაშეები შედიან, მეორე გუნდი პირველზე ერთი საფეხურით ქვემოთაა, მაგრამ ასევე კარგი მორაგბეებითაა დაკომპლექტებული. მესამე გუნდში კი ის ბავშვები არიან, რომლებმაც ახლახან დაიწყეს რაგბის თამაში. როგორც მწვრთნელები ამბობენ, ყველა პატარა მორაგბეს აქვს შანსი, მეორე გუნდიდან პირველში გადავიდეს, მთავარია, რამდენად ბევრს იშრომებენ ამისთვის. 

„ამ გუნდის შეკრების იდეა ეკუთვნის ირაკლი გიორგაძეს, რომელიც უმაღლესის ლიგის მწვრთნელია. თუ გვინდა, რომ წინ წავიდეთ, ფიზიკურადაც მომზადებულები ვიყოთ და წარმატებასაც მივაღწიოთ, ამისთვის უნდა მოვემზადოთ. შესაძლებლობების მიხედვით დაყოფა და გუნდების გაკეთება ბავშვებისთვისაც სტიმულის მიმცემი აღმოჩნდა. პირველ გუნდში არიან ისინი, ვინც შედარებით უკეთეს ფორმაში არიან, უკეთესად იციან თამაში.

მეორე გუნდისთვის პირველ გუნდში მოხვედრაა სტიმული. ეს ბავშვები ერთად გაივლიან პროფესიონალ მორაგბეებად ჩამოყალიბების გზას და რამდენიმე წელში ერთ დიდ გუნდად იქცევიან,“ – ამბობს 14 წლამდე ასაკის მორაგბეთა მწვრთნელი თენგიზ გოგიბერიძე.

14-წლამდელების პირველ გუნდში დღეისათვის 23 მორაგბეა. გუნდს ორი მწვრთნელი წვრთნის. მეორე კატეგორიის გუნდიც 23 ბავშვითაა დაკომპლექტებული. დამწყებების რაოდენობა კი ორმოცს აღწევს.

„თავიდან რომ შეგეხედა მათთვის, ვერ დაამყარებდი დიდ იმედებს. მაგრამ სწორი მიდგომით ძალიან შეიცვალნენ ბავშვები. იმედია, მათი სახით „ბათუმს“ ეყოლება ძალიან კარგი თაობა და მნიშვნელოვან გამარჯვებებს მოვიპოვებთ. ამისთვის ვმუშაობთ ყველა  თავჩახრილი,“ – ამბობს თენგიზ გოგიბერიძე.

ფოტო: მანანა ქველიაშვილი/ბათუმელები

სარაგბო კლუბ “ბათუმის” 14-წლამდელების გუნდი ამ ეტაპზე მხოლოდ საფესტივალო თამაშებს მართავს. მომავალი წლიდან კი უკვე B – ლიგაში ითამაშებენ.

 

 

გადაბეჭდვის წესი


ასევე: