მთავარი,სიახლეები

გრიბოედოვის ქუჩას ეწოდოს ტატუნაშვილის სახელი – ინიციატივა ბათუმის საკრებულოში

22.03.2018 • 2924
გრიბოედოვის ქუჩას ეწოდოს ტატუნაშვილის სახელი – ინიციატივა ბათუმის საკრებულოში

ბათუმის საკრებულოს ფრაქცია „ერთიანი ნაციონალური მოძრაობა“ ბათუმში გრიბოედოვის ქუჩის სახელის გადარქმევისა და ამ ქუჩისთვის არჩილ ტატუნაშვილის სახელის მინიჭების ინიციატივით გამოდის. ფრაქციის თავმჯდომარის, მირდატ ქამადაძის ინფორმაციით, ინიციატივა უკვე მზადაა და მას ფრაქცია ხვალ, 23 მარტს, ოფიციალურად დაარეგისტრირებს.

„ეს არის ზეპარტიული იდეა, უბრალოდ, რადგან ჩვენ გვაქვს ფრაქცია საკრებულოში, ვაპირებთ, რომ ფრაქციის სახელით დავარეგისტრიროთ ეს საკითხი“, – განმარტა მირდატ ქამადაძემ.

ბათუმის საკრებულოს თავმჯდომარის, სულიკო თებიძის თქმით, ჯერ ზუსტად არ იცის, დაუჭერს თუ არა მხარს ამ ინიციატივას. სულიკო თებიძე: „ვიმსჯელებთ ამ ინიციატივაზე უმრავლესობასთან ერთად. იმაზე, რომ ერთ-ერთ ქუჩას უნდა ვუწოდოთ ტატუნაშვილის სახელი, მეც ვფიქრობდი“.

გრიბოედოვის ქუჩა ბათუმში ერთ-ერთი ცენტრალური ქუჩა. რაც შეეხება გრიბოედოვს, ის იყო მეფის რუსეთის დიპლომატი. მას დაწერილი აქვს კომედია „ვაი ჭკუისაგან“.

ცხინვალში მოკლული არჩილ ტატუნაშვილის ცხედარი ქართულ მხარეს 20 მარტს, წითელი ჯვრის მისიის შუამავლობით გადმოსცეს. მას ექსპერტიზა სამხარაულის ბიუროში ჩაუტარდა. წამების მსხვერპლთა რეაბილიტაციის ცენტრი „ემპათია” არჩილ ტატუნაშვილის ექსპერტიზასთან დაკავშირებით აცხადებს, რომ წინასწარი ინფორმაციით, ტატუნაშვილის სხეულზე წამების კვალი აღინიშნება.

 

 

გადაბეჭდვის წესი


ასევე: