ქედის მუნიციპალიტეტის სოფელ ჭინკაძეებში კარიერი ჩამოიშალა. ქედის მერის, ლევან გორგილაძის ინფორმაციით, მთიდან ჩამოსულმა მიწის მასამ კარიერზე მომუშავე ტრაქტორი დააზიანა. როგორც მერმა განაცხადა, ამ ეტაპზე მდინარე ბზანას დატბორვისა და შეგუბების საშიშროება არ არის: „ბზანას ხეობაში ძველი კარიერიდან მიწის მასა ჩამოვიდა და დააზიანა ტრაქტორი, მსხვერპლი არ არის, არ არის წყლის შეგუბების საშიშროება, სადაც ტრაქტორი მუშაობდა, იქ ჩამოვიდა მიწის მასა და ტრაქტორი დააზიანა.“
ლევან გორგილაძის ინფორმაციით, სოფელ ჭინკაძეებში არსებული კარიერიდან მოპოვებულ ინერტულ მასალას კომპანია ადგილზე ამუშავებს. ინფორმაცია იმის შესახებ, თუ რომელი კომპანიები მოიპოვებენ ინერტულ მასალას აჭარაში და სად, „ბათუმელებმა“რამდენიმე დღის წინ ეკონომიკის სამინისტროდან გამოითხოვა. სამინისტროდან მიღებული ოფიციალური ინფორმაციის მიხედვით, არც ერთ კომპანიაზე სოფელ ჭინკაძეებში არსებულ კარიერზე ინერტული მასალის მოპოვებაზე ნებართვა გაცემული არ არის.
