აჭარის მთავრობის თავმჯდომარის, ზურაბ პატარაძის ინფორმაციით, მაღალი გამავლობის ავტომობილების ტვირთის სიმძიმის გასაკონტროლებლად, უახლოეს პერიოდში, სპეციალურ სასწორებს დააყენებენ და იმ შემთხვევაში, თუ ავტომობილები ცენტრალურ საავტომობილო გზაზე კანონით განსაზღვრულ ტვირთის ზღვრულ ნორმას გადააჭარბებენ, დაჯარიმდებიან.
ბათუმი-ახალციხის ცენტრალურ საავტომობილო გზის ქედის მონაკვეთზე ინერტული მასალის მომპოვებელ კომპანიებს მდინარის სანაპიროდან ამოღებული მძიმე ტვირთი ყოველდღიურად გადააქვთ, ტვირთის სიმძიმეს კი, არავინ აკონტროლებს.
„მართალაც არ არის სახარბიელო მდგომარეობა გზაზე, მაქსიმალური კონტროლი უნდა იყოს ხელისუფლების, საგზაო დეპარტამენტისა და იმ სამსახურების მხრიდან, რომლებმაც უნდა გააკონტროლონ გზებზე ტვირთის სიმძიმე. დღეს საუბარი გვქონდა საგზაო დეპარტამენტთან აღნიშნულ საკითხზე და დავგეგმეთ მოეწყოს შესაბამისი სპეციალური სასწორი, რომელიც გააკონტროლებს, თუ რა მოცულობის ტვირთით გადაადგილდება ავტომობილები. აუცილებლად მკაცრად დაისჯებიან ის კომპანიები, რომლებიც დადგენილ ზღვრულ ნორმას გადააჭარბებენ,“ – განაცხადა ზურაბ პატარაძემ.
