ბათუმში ორი ბიჭის – გიორგი ხაჭაპურიძისა [19 წლის] და ზვიად სახლთუხუცესის [25 წლის] მკვლელობის საქმეზე ბრალდებულებს სასამართლომ წინასწარი პატიმრობა შეუფარდა. ნიკა ბ.-სთვის აღკვეთი ღონისძიების შეფარდების საკითხის განხილვა ახლახან დაასრულა მოსამართლე თამარ ბეჟანიშვილმა.
საუბარია გასული წლის 5 აგვისტოს ბათუმში, ხიმშიაშვილის ქუჩაზე მომხდარ მკვლელობაზე. თბილისიდან დასასვენებლად ჩამოსული გიორგი ხაჭაპურიძისა და ზვიად სახლთუხუცესის ცხედრები ნაქირავებ ბინაში 8 აგვისტოს იპოვეს.
განზრახ მკვლელობას გამოძიება ორ ბიჭს ედავება. გამოძიების ვერსიით, მკვლელობა „კისრის არეში ხელის მიჭერის გზით მოხდა“. ერთ-ერთ ბრალდებულს, რუსლან ბ.-ს მოსამართლე ვიოლეტა ფორჩხიძემ 16 თებერვალს შეუფარდა წინასწარი პატიმრობა.
“ბრალის დადასტურების შემთხვევაში, თქვენ გელოდებათ თავისუფლების აღკვეთა 16-დან 20 წლამდე ვადით, ან უვადოდ,” – მიმართა ბრალდებულ ნიკა ბ.-ს მოსამართლემ.
ბრალდებულები ბრალს არ აღიარებენ და ამ ეტაპზე დუმილის უფლებით სარგებლობენ. ბრალდებულები თბილისისა და გარდაბნის მუნიციპალიტეტის მცხოვრებლები არიან.
პროკურატურის ვერსიით, მკვლელობის შემდეგ ბრალდებულები თურქეთში წავიდნენ. “ისინი მას შემდეგ დაბრუნდნენ, როცა დარწმუნდნენ, რომ ეჭვი მათ მიმართ არ არსებობდა,” – დასძინა პროკურორმა, გიორგი რამიშვილმა.
საქმეში არსებობს ბრალდებულებს შორის სატელეფონო ჩანაწერი, რითაც, პროკურატურის ვერსიით, დასტურდება ანაბეჭდების განადგურების მცდელობა.
მოსამართლეს პროკურორმა უთხრა ისიც, რომ მკვლელობის ადგილიდან წაღებულია ნოუთბუქები და მობილური ტელეფონები.
სასამართლო სხდომას მოკლული ბიჭების ოჯახის წევრებიც ესწრებოდნენ. მათი თქმით, მკვლელობის ადგილიდან წაღებულია ფული – 8 ათასი ლარი და გაურკვეველია, რატომ არ საუბრობს ამაზე პროკურატურა.
ერთ-ერთი მოკლულის მამამ “ბათუმელებს” უთხრა, რომ ბრალდებულები გარდაცვლილებს იცნობდნენ და მკვლელობა ქურდობის მოტივით მოხდა.
