ბათუმში სტადიონის მშენებლობა დაიწყო [ფოტო]

საერთაშორისო სტანდარტების სტადიონის მშენებლობას ბათუმში დღეს, 21 იანვარს, ჩაუყარეს საძირკველი. სტადიონი 20 ათას მაყურებელზე იქნება გათვლილი და მისი მშენებლობა 2020 წლის სექტემბერში უნდა დასრულდეს. სტადიონის საძირკვლის ჩაყრას ცენტრალური და ადგილობრივი მთავრობის წარმომადგენლები ესწრებოდნენ.

„დღეს არის განსაკუთრებული გრძნობა, ყველანი ბედნიერები ვართ. ყველას გვიხარია ბათუმის ცენტრალური სტადიონის მშენებლობა. ძალიან მალე, ორ წელიწადში მივიღებთ ახალ სტადიონს. დარწმუნებული ვარ, აქ გაიმართება მნიშვნელოვანი სპორტული ღონისძიებები. ეს არის როგორც ჯანსაღი ცხოვრების პოპულარიზაცია, ასევე სხვადასხვა საერთაშორისო ღონისძიებების ჩატარების ადგილი. პირველ რიგში, ეს დღე მინდა მივულოცო ბათუმელებს. კარგად მახსოვს, წინასაარჩევნო პერიოდში თითქმის ყველა მოსახლე მთხოვდა, როდის იქნებოდა ბათუმში ცენტრალური სტადიონი და დღეს ეს სიტყვა იქცა საქმედ,“ – აღნიშნა ზურაბ პატარაძემ, აჭარის მთავრობის თავმჯდომარემ.

ბათუმის სტადიონს კომპანია „ანაგი“ ააშენებს UEFA-ს IV კატეგორიის სტანდარტებით. მშენებლობის ღირებეულება 99 448 408 ლარია.

ბათუმში სტადიონის მშენებლობის საკითხი რამდენჯერმე გადაიდო და დროში გაჭიანურდა. ამჯერად მშენებლობის დამკვეთი შპს „სტადიონია, რომელიც სპეციალურად შეიქმნა აჭარის მთავრობამ  ახალი საავადმყოფოსა და ბათუმის საფეხბურთო სტადიონის მშენებლობის მიზნით. შპს „სტადიონი“ აჭარის ფინანსთა და ეკონომიკის სამინისტრომ მას შემდეგ შექმნა, რაც სტადიონის პროექტირებაზე სამინისტროს მიერ გამოცხადებულ ტენდერში გამარჯვებულთან სამინისტრომ კონტრაქტი შეწყვიტა, ამ კომპანიამ კი სამინისტროს სასამართლოში უჩივლა. 2015 წლის ბოლოს ცნობილი გახდა, რომ ბათუმში საფეხბურთო სტადიონი თურქული კომპანია „BAHADIR KUL ARCHITECTS“ პროექტით აშენდებოდა. სტადიონი ყოფილი მანქანათმშენებლის ტერიტორიაზე, 8 ჰექტარზე განთავსდება.

ბათუმის სტადიონის საძირკვლის ჩაყრის ცერემონია /21.01.2018/ ფოტო „ბათუმელები“