მახუნცეთში, თამარის ხიდის მიმდებარე ტერიტორიის მოსაწყობად ქედის მერია წელს 62 897 ლარის დახარჯვას გეგმავს. სამუშაოების შესყიდვაზე მერიამ ტენდერი გუშინ, 18 იანვარს გამოაცხადა. სატნდერო პირობით, თამარის ხიდის მიმდებარედ გარე განათება, რკინა-ბეტონის ბილიკი, პანდუსი და მოაჯირები უნდა მოეწყოს, ბილიკის ბოლოს კი გრუნტზე ქვიშა-ხრეშოვანი ნარევი უნდა დაიყაროს.
კეთილმოწყობის სამუშაოებისთვის 62 897 ლარზე გამოცხადებული ტენდერი 8 თებერვალს დასრულდება, სამუშაოები კი პირველ მარტამდე უნდა დაიწყოს.
წელს მახუნცეთში, თამარ მეფის ხიდთან, სველი წერტილის მოწყობაც არის დაგეგმილი, რისთვისაც ელექტრონული ტენდერი მერიამ გასული წლის დეკემბერში გამოაცხადა. სველი წერტილის მოსაწყობად მერიამ ხელშეკრულება შპს „ზადუსთან“ გასული წლის დეკემბერში 25 499 ლარსა და 91 თეთრზე გააფორმა.
